Macron ùn hà capitu nunda. Nè à a zerga di i Francesi, nè à i bisogni di a transizione energètica. È ùn capisce nunda à u perìculu nucleariu. Per ellu, u nucleariu hè l’avvene.
Dice ch’ellu vole fà cresce l’energìe rinuvelèvule, ma ùn vole riduce a parte di u nucleariu in u mischiu energèticu francese. A chjusura di Fessenheim, parechje volte rimessa, hè torna una volta ripurtata malgratu u rìsicu d’accidente à a più vechja centrale nuclearia francese. L’altri reattori sò mantenuti per quasi 20 anni allora ch’elli sò dinù una minaccia. U parcu nucleariu francese hè u secondu u più impurtante di a pianetta dopu à i Stati Uniti. Ci hè di chè à dassi penseru. A maiò parte di e centrale sò vechje è in gattivu statu. EDF, chì e rege, hè in gattivu statu anch’ellu, cù milliardi di dèbiti dopu à u scàndalu d’Areva è u fiascu di l’EPR. Vale à dì, sè vo aghjustate ssi dui parametri, vechjaia è pochi mezi per dà di pettu à a securità di e centrale, cresce u perìculu d’un accidente nucleariu in Francia.
Ma cumu serà chì l’omu ùn ghjunghje mai à tirà e lezziò di i so castichi ? Nè Tchernobyl, nè Fukushima, puru catastrofe tremende ch’ùn sò ancu finite, ùn ci anu aiutatu à capisce ssa minaccia nuclearia. A Francia s’inchjocca ind’è ssa scelta puzzicosa è scema. U nucleariu hè un fiascu ecunòmicu ed eculògicu chì si manghja milliardi è milliardi d’àuri chì ci màncanu dopu à mette in ballu e vere suluzioni per luttà contr’à u riscaldimentu climàticu. Sorte di u nucleariu hè urgente, è hè pussìbule dìcenu l’antinuclearii. È sò buciardi quelli chì dìcenu u cuntrariu. A surtita di u nucleariu ùn costa micca più caru chì a scelta di rinuvellà u parcu francese. U prezzu di u nucleariu ùn face chè cresce, invece chì quellu di l’energìe rinuvelèvule cala di più in più. A surtita di u nucleariu hè un vantaghju ecunòmicu è suciale cù 700.000 impiechi da creà, è una calata di a fattura energètica di e famiglie di 12%. U nucleariu pruduce dinù emissioni di gaz à effettu di serra ch’omu pò riduce pè a pianetta. Senza scurdassi di u vantaghju u più maiò: micca rìsicu d’accidente, è micca mulizzi radiuattivi da sbarrazzassi ! Dice a reta contr’à u nucleariu ùn hè tantu cumplicatu di chjode i 58 reattori francesi. U nucleariu in Francia raprisenta solu 17% di a pruduzzione energètica. È à livellu mundiale, raprisenta 2,4 % di l’energìa cunsummata. Vale à dì, hè l’energìa di u passatu micca di l’avvene ! Ùn ci mancherà tantu è ghjè pussìbule di travaglià in furia à u so rimpiazzamentu. L’energìe di l’acqua, di u sole è di u ventu anu mondu più capacità elèttriche stallate dapoi l’annu 2000.
U nucleariu hè una burla tamanta u mondu. È una minaccia pèssima. Basta !
Fabiana Giovannini.