Si chjamava Alan. Quale s’arricorda di ssu nome ? Alan Kurdi era ssu ciucciu di 2 anni trovu mortu nant’à una spiaggia turca u 2 di sittembre 2015. Tandu u mondu cummossu imparava a nutizia è tutt’ognunu si rivultava mughjendu « mai più »… Già in 2013, u drama di l’ìsula taliana di Lampedusa avìa fattu 600 morti. 10 anni dopu, torna 600 personi anu persu a vita sta volta à u largu di Pylos in Grècia. I guardiacosti averìanu custrettu stu battellu di miseria à alluntanassi… è nè l’autorità greche, nè quelle maltese, nè quelle taliane sò intervenute. Una centinaia di personi hè stata salvata, l’altri, circa 600, si sò annudati.
Stu 21 di ghjugnu 180 urganisazioni ind’una lèttera aperta anu dumandatu un inchiesta, è sopratuttu dinùnzianu a pulìtica migratoria di l’Auropa, l’impunità di i Stati, a criminalisazione di l’urganisazioni umanitarie chì pròvanu à porghje succorsu. « E pulìtiche aurupee di migrazione è di sternalisazione sò rispunsèvule di e viulenze fìsiche è psicològiche chì mènanu e personi migrante » dice sta lèttera aperta. « L’8 di ghjugnu, u Cunsigliu aurupeu hà adupratu una riforma di l’asiliu aurupeu cumunu (RAEC) chì cunduce à una privazione massiva di i dritti fundamentali cum’è u drittu d’asiliu o u drittu d’andà è vene di manera lìbera. » A lèttera s’inchieta torna di e cundizioni d’esiliu ch’impeghjurìscenu, purtendu e personi à piglià strade di più in più periculose.
In 10 anni, dapoi u 2013 in Lampedusa, omancu 27.047 personni (per quelle ch’omu hà pussutu cuntà) anu persu a vita in Mediterràniu. Frà sta corcia ghjente, ci era Alan Kurdi. A so zìa pienghje u s’addisperu dopu à u drama di Pylos : « st’annegu rinvivisce u mo dulore. Aghju u core frantu per tutte s’ànime nucente ch’ùn sò solu statìstiche… per piacè ùn firmate micca muti, mughjate cù mè. Ùn pudemu micca stà ochji chjosi è girà u spinu à sta ghjentarella chì chede prutezzione. Aprite i vostri cori è accuglièteli » dice Tima Kurdi. « A custruzzione d’un muru ùn hè micca una suluzione. Ritene i battelli chì sàlvanu vite ùn hè micca una suluzione. Purtà l’accuse nant’à sta ghjente dicendu ch’elli sò passadori ùn hè micca una suluzione. Ste personi sòffrenu è truveranu sempre mezu di fughje. Voi avete u putere di decide. » Stu mughju di suffrenza nimu ùn u sente, pochi u spàrghjenu, u mondu ferma indiferente. « U Mediterràniu ùn hè solu un Campu Santu » dìcenu i 180 urganisazioni ind’è a so lèttera aperta à i Stati, « hè una scena di crìmine contr’à l’Umanità… Dumandemu a fine di a viulenza à e fruntiere. » Dumàndanu dinù inchieste à i guverni è e stituzioni greche è aurupee nant’à u drama di Pylos : « hè tempu di fà prova di trasparenza tutale nant’à ciò chì s’hè passatu è di custringhje i rispunsèvuli à rende conti »… Dumàndanu ghjustizia pè e vìttime. Dumàndanu a liberazione di quelli chì a si sò francati è chì sò chjosi in i centri di ritensione. Dumàndanu ch’elle àppiinu prutezzione ghjurìdica è sustegnu. Dumàndanu à tutti i Stati aurupei di indità strade sicurizate pè i migranti, è d’ùn legalizà a riforma di u RAEC nant’à u drittu d’asiliu. Infine dumàndanu un prugramma aurupeu di salvezza in Mediterràniu. Da chì a morte di ste millaie di personi è di u pìcculu Alan Kurdi ghjovi à una presa di cuscenza. •
Fabiana Giovannini.
Da leghje : https://bit.ly/3NXX06m