Dapoi u 7 di maghju 2012 un decretu ministeriale ricunnosce chì a malatìa di Parkinson hè malatìa prufessiunale per l’agricultori… À tempu, si ricunnosce cusì a lea trà i pesticidii è ssa malatitaccia.
Eppuru ! Si cuntinueghja à utilizà ssi prudutti ind’è l’agricultura !
A malatìa piglia u nome di u duttore chì l’hà scuperta in u 1817. Hè una malatìa neurodegenerativa evulutiva, vale à di ch’ella impeghjurisce senza ch’omu possi curalla. Tocca à u sistema nerbosu di a persona, strughjèndusi i neuroni chì cuntrulèghjanu u muvimentu. Trèmulu, instabilità di e posture, o rigidezza musculare… a malatìa pò rende assai infirma è arruinassi u cutidianu di a ghjente.
Di ferraghju 2012, un agricultore in Charente chì si dicìa toccu da a malatìa per vìa di l’emanazione di un pruduttu erbicidiu, u Lasso, hà vintu u so prucessu contr’à a firma Monsanto. U pruduttu hè statu ritiratu di a vèndita in 2007, allora ch’ellu si sapìa dapoi 20 anni omancu quant’ellu era gattivu pè a salute. D’aprile di a stessa annata, un antr’agricultore hà fattu cundannà u Statu francese per vìa ch’ellu hè cascatu malatu anch’ellu da prudutti puzzicosi. Tutti l’anni sò 5000 pattulugìe chì sò ricunnisciute malatìe prufessiunale per l’agricultori, effetti nant’à i mùsculi o l’ossi, o malatìe neurodegenerative, irritazione, intossicazione, càncari… l’arsenicu, u benzene, u pentaclorofenole sò i prudutti fittosanitarii i più periculosi.
Puru sò effetti diffìciule da dimustrà. Secondu à a medicine di u travagliu di a Mutuale di l’agricultori, «a maiò parte di sse pattulugìe si fàcenu cunnosce dece, vinti, o trent’anni dopu à l’utilisazione di u pesticidiu… vale à dì quant’ellu hè diffìciule di vultassi dopu contr’à i rispunsèvuli ». S’aspetta, a medicina di u travagliu, à un aumentazione forte di sse pattulugìe ind’è l’anni à vene. Si pò omu pensà chì l’agricultori sò ghjente di a campagna, à gòdesi di a natura. Invece sò elli i più tocchi da sse malatìe per vìa di i pesticidii utilizati pè a lotta contr’à i topi, l’insetti, i funghi, i parasiti da tutte e mamme o l’erba folla. Colmi d’elementi è matèrie chìmiche, i pesticidii so gattivi pè a salute. À rombu d’utilisazione in e campagne, a maiò parte di l’acque sottuterrate sò cuntaminate. È avemu tutti, agricultori o nò, in u nostru sangue sustanze chìmiche. A Francia hè a più tocca.
U sangue di i Francesi hè trè volte di più cuntaminatu chì quellu di l’Americani o di l’Allemani. Ci arruinemu a salute, ma strughjimu dinù l’ambiente. L’ape sò minacciate da i pesticidii è cù elle uni pochi d’insetti vulenti. E libellule per un dette sò smarite. È cù a sparizione di ss’insetti, sò ancu l’acelli chì i manghjàvanu chì sparìscenu…
Omu si puderebbe francà di i pesticidii, u Grenelle di l’Ambiente bramava di pudè ridùceli d’omancu 50% nanzu à u 2018… ben intesa, u scopu ùn hè statu toccu.
È u paradossu ghjè chì i più grandi difensori di i pesticidii… sò l’agricultori stessi !
Fabiana Giovannini.