A Federazione Regioni è Pòpuli Sulidarii adunisce i partiti autunumisti o indipendentisti di e regioni in Francia ch’anu una forte identità, una stòria, una cultura, una lingua, è dunque rivendicazioni specìfiche. Hè stata messa in ballu in principiu di l’annate 90 è più cuncretamente creata dopu à l’elezzione presidenziale di u 94 induve ssi partiti si sò detti ch’elli duvìanu cuurdunà di manera più efficace a so azzione. R&PS s’hè datu statuti è regulamenti ben intesa, ma dinù una Càrtula di valori è obbiettivi cumuni. Scumbatte u centralìsimu pariginu è quellu di l’Auropa di i Stati, da reduce l’inugualità di sviluppu chì mènanu e regioni è i pòpuli. Permette à ogni citatinu di studià, furmassi, travaglia è campà cù dignità in u so territoriu. Luttà contr’à l’inghjustizie è agisce à prò di u prugressu suciale. Ammaestrà a so ecunumìa à favore di u so sviluppu culturale è intelletuale. Favurizà un sviluppu durèvule è armuniosu in Auropa. Fà valè a ricchezza di a diversità, cumpresu nant’à u pianu ecunòmicu in un mondu induve a forza d’un identità aperta hè un mutore di dinamìsimu è e putenzialità culturale una carta maestra pè e regioni. Incuragisce a diversità culturale è prumove dunque ss’identità, spessu pè e lingue cù a so ufficialisazione pè i pòpuli cuncernati. Priserve, intratene è valurisce u patrimoniu culturale è stòricu di sse regioni. Sviluppà a demucrazìa lucale impegnendu i citatini in e decisioni pulìtiche cù i referendum d’iniziativa pupulare, per un dettu. Prumove in Francia è in Auropa u federalìsimu secondu i principi di l’autunumìa, a cuuperazione, a sulidarità. Permette à i pòpuli spiccati da fruntiere trà Stati, d’adunìscesi in grazia à u prucessu d’unificazione di l’Auropa. Sviluppà e sulidarità cù i pòpuli in ritardu di sviluppu, à u Sud o à l’Este di l’Auropa. Scumbatte tutte e forme di razzìsimu è di zenufubìa, per una migliore cumpreensione trà i pòpuli è e cumunità, in u scàmbiu è l’accettazione mutuale di e culture.
A Federazione R&PS conta una quindecina di partiti, in Alsazia, Brittagna, Catalogna, Corsica, Mosella, Occitanìa, Paese Bascu, è Savoia. I Berberi spapersi in tutte sse regioni sò dinù membre di R&PS. A Federazione tene tutti l’anni un cungressu induv’ella decide di a so strategìa per l’annata à vene, è dapoi quìndeci anni avà tene à tempu un Università d’estate induve i militenti si ritròvanu per dibatte nant’à temi cumuni è scopre dinù a regione chì accoglie sse ghjurnate di riflessioni è di spartera. Quist’annu si passerà in Savoia, à Aix-les-Bains, da u 26 à u 28 d’aostu. Festighjeranu cusì i 50 anni di u Muvimentu Regione Savoia. R&PS conta quatru deputati à l’Assemblea naziunale, membri di u gruppu Libertà, Indipendenti, Oltremari, Territorii, un Senatore, membre di u gruppu eculugista, è un deputatu aurupeu membre di u gruppu Verde ALE. L’Alleanze Lìbera Aurupea hè un partenariu soddu di R&PS dapoi a so nàscita. R&PS hè in prugressu pulìticu è eletturale cuntìnuu dapoi parechji anni. In Corsica, dui partiti ne sò membri, u Partitu di a Nazione Corsa è Femu a Corsica. Ancu sè vo ùn site micca sociu d’un partitu membre di a Federazione R&PS, pudete partecipà à a so Università d’estate. I dibàttiti sò lìberi è aperti. Vi pudete scrive nant’à : https://bit.ly/3PmXC3y •