Sàbatu u 9 di dicembre in Portivechju, l’associu Global Earth Keaper urganizava una ghjurnata di dibàttiti chjamata « Journée Avenir Animal ». Arritti ne rivenerà à parlà chì sò sughjetti da i quali si parla pocu, eppuru definìscenu una sucietà più o menu demucràtica è sempliciamente umana !
L’animale hè un èssere cuscente, chì pensa, ama, reagisce à u s’ambiente è u so circondu. Hè dinù, spessu per l’animali detti dumèstichi, ma dinù per l’animali salvàtichi, naturalmente è fundamentalmente bravu. Ind’è a natura, ùn tomba chì per prutègesi o per nutrìscesi. À u cuntrariu di l’omu chì tomba pè u so piacè.
Global Earth Keaper hè un associu indipendente dettu ONG chì lottta pè a prutezzione di l’animali è di l’ambiente, in Francia è dapertuttu in u mondu. Cunduce azzioni di lotta contr’à e pulluzioni, a caccia è a pesca for’di lege, a sensibilisazione di u pùblicu à a càusa animale, operazioni dinù di salvezza contr’à e so suffrenze, è travagliu cù i puteri pùblichi da fà avvanzà e legislazioni di prutezzione di l’animali. L’associu hè assai attivu in Corsica. Hè presidatu da Laurenza Constantin chì campa in Corsica. S’impegna per dinunzià e situazioni di suffrenza animale, o per pullisce l’ambiente cum’è e marine è u liturale. Hà messu in ballu è partecipeghja dinù dapoi 8 anni à l’Operazione Waza, sustegnu à un Parcu naziunale à u Cameroun in Àfrica, per prutege l’animali salvàtichi caccighjati di manera illegale. Elefanti, girafe, lioni… smarìscenu à una vitezza impurtante è gravìssima. Cù l’operazione Waza, si travaglia cù a pupulazione di i paesi soprapiazza. Hè un aiutu impurtante pè a ghjente, u s’impiecu è a so securità in lochi minacciati da a guerra cù i terruristi islamisti di a setta Boko Haram. Global Earth Keaper è e so azzioni ùn càmpanu chè di l’aiutu di a ghjente è di a so forza militante.
Stu sàbatu, parechji esperti èranu invitati à fà cunnosce l’azzioni ch’ellu conduce l’associu. Scopre u mondu sunore di e prufundezze marine spiechendu cumu cumunichèghjanu i cetacei, spiecà dinù i cumpurtamenti è l’emuzioni di i cani è cumu si ponu educà in u so benestà, salvà u Parcu naziunale di Waza, porghje un sguardu nant’à a vita è a bellezza di e volpe o di e muvre, sapè cum’elli sò trattati l’animali cù l’allevu intensivu è scopre ciò ch’ella hè à sentienza, vale à dì a sensibilità animale, capisce perchè a lege prutege certi animali è micca d’altri è qualesse sò l’avvanzate legislative di l’ùltimi anni, scopre l’universu di e scìmie… a ghjurnata hè stata piuttostu carca in dibàttiti ! 1380 milliarda d’animali sò tumbati tutti l’anni in u mondu… per 7,6 milliardi d’umani ! Sò 1,2 milliarda tumbati in Francia. Vale à dì 3,2 millioni tutti i ghjorni, 8 nant’à 10 sò allevati cù l’allevu intensivu induv’elli sò maltrattati è sprezzati.
Global Earth Keeper hè stata creata da militenti chì pènsanu chì l’omu ùn deve supranà l’animale è chì i raporti trà l’omu è l’animali dèvenu règesi secondu à a Cunvenzione di a Diversità Biològica, aduprata in Rio in u 1992 è a Càrtula mundiale pè a Natura chì ricunnosce l’impurtanza per l’Umanità di a prutezzione di a Natura è di l’ecosistemi per un sviluppu durèvule, aduprata in u 1982. Impurtante lege di e Nazioni Unite da e quale si parla pocu è ch’ùn sò micca abbastanza rispettate, disgraziosamente. U mondu si purterebbe talmente megliu s’ellu rispettava e lege ch’ellu s’hè datu ! •