Accapu di a redazione

Risuluzioni (3)

Avemu parlatu e duie settimane scorse di e scumesse chè no pudemu fà per rende l’annata più bella, sti pìcculi sforzi per l’ambiente è pè a nostra lingua è a nostra cultura. Basta d’un pocarellu per cambia di versu, è sè u femu tutti inseme, u nostru cutidianu è quellu di a Corsica ponu cambià in megliu.

Sta terza è ùltima parte di e risuluzione chì ferìanu di 2023 un annata più bella chè u 2022, cuncerna dinù u cullettivu, ma hè un bisognu à u livellu di a pianetta è di e putenze chì a règenu. Hè dunque una brama, ma micca un utopìa, postu ch’ellu hè un bisognu tremendu da dassi un avvene pè e generazioni à vene. Ci sò duie catastrofe umane chì minàccianu u mondu è chì sò spessu opposte, u nucleariu è u riscaldimentu climàticu. Invece nò : u nucleariu ùn hè micca una suluzione à u riscaldimentu climàticu ! Sò bugìe ch’elli spàrghjenu l’industriali di u nucleariu, spessu in Francia chì ghjè una nazione nuclearia, per dì chì e centrale prudùcenu pocu gasu carbònicu. Attempu, si scòrdanu di dì chì u nucleariu pruduce quantità fenumenale di lozzu radiuattivu ch’omu ùn sà cumu sbarrazzàssine. Cusì a pianetta s’impuzzichisce per parechje millaie d’annate… è più ci serà nucleariu è più ci serà lozzu d’ùn sapè cosa fanne… Ci hè a radiuattività di u lozzu pruduttu durante à l’estrazzione di l’uranium (in paesi in guerra, o paesi di misèria chì l’industriali è l’Occidente sfrùttanu). Ci hè u lozzu sputatu durante à u funziunamentu di e centrale (ind’è l’ària è ind’è l’acqua lampata calda in i fiumi o ind’è a Manche da l’usina di trattamentu nucleariu di La Hague). Eppò, tutti l’anni, ci tocca torna à neutralizà 1200 tunnellate di cumbustìbule sfruttu, uscitu da u reattore, è messu ind’è pissine fatte appostu accantu à i reattori nuclearii. Cum’elle sò sempre ind’è e centrale, ùn sò micca cuntabilizate cum’è lozzu. Puru, ùn sò micca riciculèvule. Ci sò 63 pissine in Francia chì cuntènenu cusì più di 10.000 tunnellate di lozzu radiuattivu ! Sè vo aghjustate in più i 30.000 tunnelate di lozzu in Pierrelate ch’anu ghjuvatu à u nucleariu militare… Avete capitu chì l’industriali ci còntanu bugìe tamante à u mondu ! U nucleariu hè un fragellu. È ùn aghju micca parlatu di u rìsicu d’accidente ch’hè tamantu, è di u prezzu ch’ellu ci costa, ch’hè tamantonu dinù ! U nucleariu hè un perìculu per l’Umanità. Ci vole à sòrtenne à u più in fùria.

Luttà contr’à u riscaldimentu climàticu cummanda altre risuluzioni. U mondu hà capitu (infine !) ch’ellu hè un perìculu maiò, crèscenu e timperature, è cù elle i ciambuttamenti climàtichi, e timpeste, e sicchine, l’acidificazione di l’oceani, a strughjitura di i ghjacciaghji. I putenti di a pianetta ùn tènenu micca i so ingagiamenti di pruduce menu gasu carbònicu, è più và, più s’àlzanu e timperatu è e catastrofe mundiale, più s’alza u livellu di i mari minacciendu di summersione i liturali, più sò cundutti à migrà millioni di ghjente, più i disiquillìbrii demugràfichi cundànnanu l’Umanità à e guerre è à a misèria… Risuluzioni ? Riduce di manera impurtante l’energìe fussile, prumove l’energìe rinuvellèvule ch’anu da pruduce mondu ricchezze è impiechi, riduce dinù l’allevu di u bestiame, ùn ci hè bisognu di manghjà carna tutti i ghjorni, priservà l’acqua, e fureste, a natura. S’hè vistu chì dopu à a risuluzione di piantà i gasi aerosoli, 40 anni fà, u tufone ind’è l’ozona si colma pocu à pocu… Vale à dì : avemu mezu d’agisce è di custruisce un mondu più bellu.

Pace è Salute à a Pianetta ! •

Fabiana Giovannini.