A Francia hè cummossa da u crìmine tremendu d’una giuvanotta di 19 anni, viulentata è assassinata da un immigratu maruccanu di 22 anni, Taha Oualidat, chì duvìa esse spulsatu da u territoriu francese dopu à avè viulentata un antra giuvanotta di 22 anni in 2019 … I mèdia si tèchjanu di u drama è a stremadritta u strumentalizeghja. Esciutu da a prigiò, l’omu hè firmatu in Francia senza cuntrollu, allora ch’ellu ùn avìa nè locu per campà, nè indirizzu, nè travagliu, nè nunda per ghjustificà a so surtita. Si n’hè andatu tranquillu… pò hè smaritu sin’à ssu maladettu 20 di sittembre induve Philippine hà scuntratu u so assassinu. A Francia si pone e quistioni, perchè ghjente cum’è stu perversu ùn sò micca curati, malgratu u « rìsicu ch’ellu raprisentava » ? Perch’è ùn hè micca statu spulsatu cum’ellu era previstu, o omancu presu in càrica da a sucietà per impedìscelu di ricumincià ?
À cantu à què… a sucietà si scatineghja nant’à a pòvera ghjente, chì travaglia, hè inserita sucialmente, sparghje u bè in giru à ella… A stòria di Sam Assima hè stumachente. Studiente tugulese hè statu piazzatu in locu di retenzione, per esse spulsatu di Corsica. Ghjuntu legalmente in Italia per seguità i so studii in 2012, hà decisu di cuntinuali in Francia in u 2015. Bramava d’esse regularizatu dopu à avè ottenutu di bella manera un diplomu universitariu di cuntabilità è un Master of Business Administration, di gestione d’imprese. Sh’è dinù scrittu in tesa di management. In 2018, l’amministrazione francese li significheghja un ubligazione di parte di u territoriu (OQTF). Cuntinueghja i so studii dumandandu una regularisazione. In 2021, torna un OQTF di a prefettura, po torna in 2024. Malgratu u so prugettu d’impresa ind’è l’ecunumìa sulidaria, malgratu intervenzioni da tutte e mamme, malgratu ch’ellu ùn hà più lea cù u Togò, malgratu ch’ellu ùn hà mai postu prublema in Francia, malgratu una prumessa d’impiecu… ùn ci hè nunda à fà, a prefettura li ordonna di parte. « Hà da esse rinviatu à u Togò, un paese induv’ellu ùn hà più lee, induve nimu ùn l’aspetta, un paese particularmente instàbile, toccu da offensive ripetute di gruppi islamisti, cù rìsichi evidenti pè e pupulazioni civile » spieca a Lega di i diritti di l’omu di Corsica. Sam Assima hà parechji diplomi, parla parechje lingue, hà una voglia tamanta u mondu di pudè custruisce a so vita quì è rende ciò chì li hè statu datu. « U mo cutidianu diffìciule m’hà datu un edea d’impresa. Avìu bisognu di vestiti, ma eru senza soldu. Aghju prupostu barattera è donu di vestiti. Ma e piattaforme in lìnea ùn èranu efficace. Travagliu nant’à un sistema più lindu è ràpidu chì s’appoghja nant’à e nove tecnulugìe cum’è l’intelligenza artificiale. Sta dimarchja si scrive ind’è l’ecunumìa verde, postu ch’ella riduce lozzi tessili pulluanti per l’ambiente » dice Sam. « Hè a Francia chì m’hà furmatu, è oghje mi lampa fora cum’un mullizzosu… a mo vita hè cum’un battellu nant’à un mare gattivu. À le volte in cima à u maròsulu, à le volte incavatu… ma fieghju sempre più altu ».
« Contr’à l’espulsione d’un giòvanu talente » dice a banderola di parechji associ ch’anu manifestatu per Sam d’aostu scorsu. Cumu capisce chì ùn si dumanda nunda à un Taha Oualidat, un veru assassinu… è ch’ellu si manda à caternu un Sam Assima chì dà tutte e guaranzìe d’un integrazione riesciuta ? Stumacheghju. •