Omi chì si vèndenu d’altri omi in core di u vintunèsimu sèculu… u mondu ferma un infernu per uni pochi di corcia ghjente ! Un documentariu spaventosu di u mèdia americanu CNN porta a prova di l’esistenza di tràffichi d’omi ch’èranu dinunziati dapoi un pezzu da l’ONG ch’aiùtanu i migranti in u Meditterràniu. L’Auropa ùn a vulìa sente ch’ùn vede chè u so capatoghju quand’ella affacca ssa corcia ghjente nant’à e nostre sponde. CNN li porghje testimogni è imàgine tremende, filmate cù una camerà piatta. Vèndita à l’asta nant’à marcati di schiavi, omi è donne è zitelli addisperati, u più bruttu di l’umanità contr’à l’umanità… E cose si pàssanu à qualchi chilòmetru di Tripoli, a capitale libbiana, d’ottobre scorsu.
Una dodecina d’omi sfìlanu è si sente mughjà, 500 dinars, 550, 600, 650… vale à dì trà 300 è 400 auri… cusì pocu valore a vita d’un omu! I marturiati vènenu da u Nigeria, u Ghana, u Malì, è saranu impiecati in a custruzzione o l’agricultura. Dice CNN « sò millaie i migranti è i riffugiati à francà a Libbìa ogni annu in cerca d’una vita più bella in Auropa. Ma per vìa di a ripressione in Auropa, ci sò menu battelli chì pìglianu u mare è uni pochi stanu nant’à i bracci di i trafficanti chì i si vèndenu à l’asta cum’è schiavi… » SOS Mediterràniu hè un associu chì s’hè datu un battellu, l’Aquarius, per purtà aiutu à sta ghjentarella. Dapoi u 2016 dinùnzia « a tratta massiva di l’èsseri umani in Libbìa, ghjente chjosi in i campi, induve si muneta a vita cristiana. A ghjente hè vinduta parechje volta, d’un cuntrabandieru à l’altru, d’un paese à l’altru, d’una cità à l’altra…» D’aprile scorsu, l’Urganisazione Internaziunale di e Migrazione, urganìsimu leatu à l’ONU, hà fattu un inchiesta è custatèghja anch’ella «migranti, pè u più nigeriani, ghaneani o gambiani custretti à travaglià pè u so marcante di schiavi. » SOS Mediterràniu conta una situazione ancu di più tremenda.
«Ci hè a schiavitù, ma ci hè dinù donne o omi viulentati, umiliazione, scruccunerìa, turtura, a vita umana ùn hà prezzu. » È quandu a si franca di tuttu què, ssa pòvera ghjente imbarca nant’à battellacci di furtuna… pochi ghjùnghjenu sin’à noi, d’altri s’annèganu in mare… Eppuru cuntinuèghjanu à sperà à quellu paradisu, lachendu a so vita di miseria per pruvà di ghjunghje sin’à in Auropa ! L’Auropa ch’hà cuntrattatu cù a Libbìa da ch’ella si ripigliessi i migranti salvati in mare. Una volta torna culandi, sò a preda di i marcanti di schiavi… Chjosi in i centri di detenzione, sò turturati mesi è mesi. Hè ciò ch’ella mostra CNN. «A cumunità internaziunale ùn pò cuntinuà à chjode l’ochji nant’à l’orrori campati da i migranti di Libbìa. A pulìtica di l’Unione Aurupea aiutendu i guardiacosti libbiani à chjappà è rinvià i migranti hè inumana » dice l’ONU chì conta omancu 20.000 personi in i campi di detenzione libbiani…
Fabiana Giovannini.