U filmu Oppenheimer esciutu pocu fà ci mostra quantu i Stati-Nazioni si ghjòvenu di l’omi per scatinà a so putenza nant’à l’Umanità. È quantu l’omu ch’hà inventatu a bomba atòmica cridìa cù st’arnese d’apucalisse impone di manera quasi miraculosa, a pace per sempre in u mondu sanu… A seconda guerra mundiale s’hè compia in un scempiu spaventosu cù, in un lampu, omancu 250.000 morti à Hiroshima è à Nagasaki… senza cuntà i morti ghjunti dopu trà i feriti gravamente brusgiati o suffiati, è più tardi quelli iradiati, morti di u càncaru. U nùmaru precisu di e vìttime ùn serà mai cunnisciutu, è ghjè vàriu secondu à u Giappone o à i Stati Uniti. S’hè compia a guerra, ma à chì prezzu umanu ? Fora di sse centunaie di millaie di vìttime, Little Boy è Fat Man (u nome chì l’americani avìanu datu à e bombe) anu pruvucatu una corsa tremenda à u nucleariu militare, in Russìa, in Auropa, eppò dopu in u mondu sanu. È oghje sempre, u nucleariu militare minaccia senza impedisce guerre è stirpere, in manu à scemi strapazzi ch’ùn ritènenu nunda di e lezziò di a stòria.
Cù a guerra in Ucràinia, s’hè ben vista chì u nucleariu pudìa esse un arnese per fà a guerra, minacciendu a pianetta è ghjuchèndusi di a paura di i pòpuli… È ùn hè ancu à finì.
Ci avvicinemu di a notte di Natale, è u mondu soffre in core stessu di i lochi ch’anu vistu nasce, soffre, more è risuscità Cristu. 8000 zitelli sò morti in Gazà, 6200 donne. U bilanciu tremendu di a guerra culandi hè quasi di 19.000 morti ssu 17 di dicembre. 7500 sò dinù smariti, è omancu 50.000 feriti frà i quali numarosi struppiati pè a vita. 1,9 millione di personi sò state spiazzate versu u Sud, vale à dì 85 % di a pupulazione. Un esiliu impostu insuppurtèvule cù cundizioni di vita spaventose per sta corcia ghjente. I bumbardamenti ùn piàntanu, è ùn ci hè più un spaziu induve truvà riposu, senza acqua, senza elettricità, senza robba da manghjà.
Quantu hà da durà torna ssu cunflittu ? A dittatura iraniana chì marturieghja u so pòpulu, core anch’ella appressu à l’arma nuclearia è minaccia à Israela. Israela hè cinta da tutte e parte da pòpuli ch’ùn sunièghjanu ch’à a so sparizione, l’ebrei càmpanu cù a paura permanente di un antru 7 d’ottobre ch’hà fattu quasi 1.300 morti, centinaie di feriti è 200 ostagi (ne fèrmanu circa 140 oghje).
U scempiu di sta guerraccia hè schiattatu in faccia di u guvernu israelianu da u martoriu ssu 15 di dicembre di 3 ostagi chì si pensàvanu infine liberati dopu à dui mesi di martoriu. Cù a so bandera bianca, parlendu in ebreu, anu ludatu i suldati israeliani ch’affaccàvanu. Li anu tiratu à dossu… Sò l’ùltime vìttime israeliane di u 7 d’ottobre 2023, a vindetta trà odiu è paura si sfoca nant’à nucente vìttime. Ssa tragedìa in a tragedìa mostra quant’ella hè inghjusta è pèssima a guerra, è ch’ella ùn pò salvà à nimu a viulenza in risposta. Chè no sìamu cridenti o nò, o ghjente, a sola manera d’impone è mantene a pace in u mondu, ghjè cumpurtassi in « cristianu » cum’ella a dice magnificamente a lingua corsa, vale à dì in tantu chè umanu, sìmbulu di l’amore sparsu trà l’omi 2000 anni fà ind’un stalla.
Bon Natale di pace è d’amore à tutti.
Fabiana Giovannini.