80 % di l’insetti vulenti anu sparitu st’ùltimi 30 anni. A càusa hè a crèscita di l’impiecu di i pesticidii in l’agricultura. Menu di 30 anni per strughje ciò chì millaie d’annate anu fattu à creà… hè un scumpientu dramàticu è inchietante chì mostra chì a morte di l’ape ùn hè chè un esempiu di u disastru chè no simu in traccia di campà. Ùn si vèdenu più farfalle, calacaloci, barabulelle, filangrocche, lucciole, santantunini, ciriole, è tant’altri mastaròculi chì pupulàvanu e nostre scuperte zitteline… Un studiu fattu in Allemagna dapoi u 1989, chjappèndusi l’insetti d’istate cum’è d’inguernu in i lochi i più prutetti d’Allemagna, hè ghjuntu à ssu custatu. Dìcenu ssi scientìfichi chì a sola spiecazione di ssa calata hè l’intensificazione di e pràtiche agrìcule chì si ghjòvanu di i pesticidii è fertilizanti di sintesi. Ssu custatu disgraziosamente ùn pò chè ritruvassi in altrò. Dìcenu torna i scientìfichi, « a Francia o u Reame Unitu anu listessi sistemi agrìculi è utilizèghjanu listessi prudutti pè e so spluttazione agrìcule… l’Allemagna hè di sicuru raprisentativa d’una situazione più larga. Simu di pettu à una catastrofa eculugista tremenda. » U sfundamentu di l’insetti hà da pruvucà listessa calata nè l’inseme di l’ecosistemi, postu ch’elli sò un zòcculu di a catena alimentaria. Hè un veru spaventu.
L’insetti vulenti pullinizèghjanu e piante è i fiori ma sò dinù a basa di nutrimentu di 60 % di e spèzie d’acelli. Elli stessi sò nutritura d’une poche di spèzie d’animali chì anch’elli nutrìscenu d’altri animali in a catena alimentaria. Ssu custatu ci ramenta un antru custatu tremendu. Quellu di a sesta spenghjitura di massa incausata da l’omi.
Dapoi parechji anni, l’Unione Internaziunale pè a Cunservazione di a Natura allarma u mondu nant’à a sparizione di l’animali. L’ùltimi studii mòstranu chì ssa sparizione và bellu più in furia chè prevista è tocca un terzu di i vertebrati. 27.600 spèzie animale sò state studiate dapoi u 1900, nant’à i cinque cuntinenti. Acelli, rettili, anfibiani terrestri sparìscenu à grande vitezza, è ci hè una crèscita di ssu scempiu dapoi st’ùltimi vint’anni. In a stòria di l’Umanità, a sparizione di 200 spèzie animale avìa messu 10.000 anni. Invece, ssu solu ùltimu sèculu, 200 spèzie d’animali sò sparute… È u custatu hè peghju : sò 32 % di i vertebrati chì sò in traccia di sparisce è 40 % di i mammiferi sò minacciati.
115.000 giraffe in u 1985, 97.000 oghje… In 2016, ùn firmàvanu più chè 7000 ghjattupardi in u mondu, è menu di 5000 orangutani, 100.000 leoni 50 anni fà in Àfrica, 32.000 oghje. 95 % di i tigri anu sparitu in menu d’un sèculu. Da quì à 10 o 20 anni, l’elefante d’Àfrica ùn esisterà più. Ma sò dinù decine di pìccule spèzie animale chì sparìscenu.
È cun elli tesori di a pianetta. O ghjente, sveglièmuci !
Fabiana Giovannini.