Ustantapane, chjamatu « revenu universel » o « revenu de base » in Francia hè una remunerazione pacata à i citatini da ch’elli pòssinu dà di pettu à i so bisogni principali. Ssu stantapane mìnimu hè una manera di dì chì tutt’ugnunu hà drittu à di chè campà. Certi u pènsanu da impedisce à ghjente di pate a fame, d’altri u vèdenu cum’una sustituzione à uni pochi d’aiuti suciali.
Per d’altri torna sarebbe una manera per certi d’ùn travaglià, da pudè investìscesi altrimente in a vita suciale, lachendu à tempu a piazza à i più ghjòvani è permette un antra pulìtica di l’impiecu.
U scopu hè di riduce a disuccupazione è permette una presa in contu più efficace di a prutezzione suciale. S’ellu hè sparsu in certi paesi, in Francia u sugettu hè sempre pulèmicu. Certi, cum’è Europa Eculugìa i Verdi l’anu scrittu in u so prugramma pulìticu. D’altri dìcenu ch’ellu incuragisce l’oziu è l’inattività è s’inchiètanu di u so finanziamentu.
Invece innò. U scopu hè di dinamizà u travagliu è a vita in sucetà. Dapoi u 2017, a Finlanda hà stituitu ssa rimunerazione di basa. U fattu si stà ch’ellu hà permessu di liberà certi posti di travagliu, da chì a ghjente possi parte in ritirata (a rimunerazione universale s’aghjusta à a ritirata).
Cusì a ghjente campa megliu, vale à dì, cunsumma di più, casca di menu malata, è prufita di a so ritirata. U sistema hà permessu dinù di riduce i capatoghji amministrativi, di raziunalizà l’aiuti suciale, di simplificà a pulìtica suciale è a fiscalità senza riduce in u stessu tempu u putere di cumprà di a pupulazione. A cumuna di Grande Synthe in u Nordu di a Francia vene di stituisce un «mìnimu suciale assicuratu » pè a ghjente in difficultà chì càmpanu sott’à u livellu di puvertà (menu di 855 àuri à u mese), vale à dì à pocu pressu 1500 personi nant’à una pupulazione di 23.000 abitanti.
A sperienza hè uriginale perch’è hè finanzata cù l’ecunumìe energètiche fatta da a cità. Hè dunque a transizione eculògica chì sustene a pulìtica suciale ! Per un dettu, e misure prese per riduce a cunsummazione di i lumi pùblichi (476.000 àuri), di a scalliera urbana (250.000 àuri), ghjuveranu à pacà ssu cumpensu à a ghjentarella. Si chjama dinù à a sulidarità cù prelevamente nant’à a tassa prufessiunale, vale à dì una spartera più ghjusta di e richesse di a cità. Cusì, sse 1500 personi puderanu tuccà trà 100 à 400 àuri di più à u mese. È cum’ellu s’indirizza à a ghjente di u lucale, a misura mette in ballu una spècia di « statutu di residente » postu ch’ellu ci vole à esse residente dapoi omancu très anni da pudè tuccà ss’aiutu. Da sapè chì u merre di Grande Synthe hè eculugista, candidatu à l’elezzione aurupea nant’à a lista di Yannick Jadot ch’hà fattu un apertura à a Corsica cù Francescu Alfonsi à a novèsima piazza.
A Corsica hà bisognu d’un deputatu aurupeu.
Fabiana Giovannini.