D’aprile scorsu, un artìculu di RTL hà sparsu una nota di a pulizza, detta cunfidenziale, nant’à u tràfficu di lozzi. Un business di 10 à 12 milliardi d’àuri ! « Quantu u tràfficu di cannabis » dice l’artìculu. Chjìbba ! Si sapìa ch’ellu era mondu mare è maraviglia u marcatu di u lozzu, ma 10 milliardi d’àuri… Saetta ! Dice sta nota chì u mondu di u lozzu hè infiltratu da a criminalità urganizata, sopratuttu ch’ellu s’appronta in Francia a Cuppa di u mondu di rugby è i Ghjochi olìmpichi 2024 in Parigi. Mansa di lozzi cù i cantieri di custruzzioni sò da caccià, « è certi ne prufìttanu » dice torna l’artìculu scrittu da Anne Le Henaff. « E màffie taliane anu capitu dapoi 30 anni l’interessu di sta filiera. È u fenòmenu gangrena ormai a Francia, sopratuttu in Parigi, in Corsica, è in PACA ». È dalli ! A Corsica in mira ! I maffiosi, dice torna Anne Le Henaff, « pratichèghjanu l’estursione di soldi è a curruzzione, fabrichèghjanu falsi documenti è vanu sin’à à cuntrullà e sucietà per piglià i marcati pùblichi. I lozzi, à le volte tòssichi, ùn sò micca riciculati. A nota parla d’un casu in u ru-ghjonu pariginu in lea cù i travaglii di u Grande Parigi. A terra pulluata duvìa esse trattata, in fatti hè stata sparsa nant’à terreni d’agricultori, custretti d’accetà »… È cunclude l’artìculu : « L’esportu di cuntrabanda hè un altru sboccu, dice a nota : plàstichi, pneus, carcasse di vitture, invece d’esse riciculati, sò inviati in Asìa o in Àfrica. »
È si sà chì l’affari sò stallati dapoi un pezzu ! Di ferraghju scorsu hè statu smantellatu da l’Italia un tràfficu di lozzi in Auropa. Un business à un livellu « vertiginosu » secondu à i carabinieri, circa una centinaia di millioni. Era tràfficu di ferrame è altri lozzi periculosi. I prudutti èranu venduti à acciarìe fendu nice ch’elli èranu stati trattati. Invece nò, i scrucconi fecìanu false dichjarazioni di cunfurmità è falsi documenti di trasportu. I benefizii dopu transitàvanu nant’à conti di sucietà taliane, allemane è ungarese per imbiancali è investìsceli nant’à d’altre sucietà, dice torna a pulizza taliana. 18 parsoni sò state arrestate, sei èranu già in prigiò è fecìanu i s’affari da à so cèllula… Ma per questi quì chjappati, quantu si tèchjanu ? In Francia torna, di ghjennaghju scorsu, hè statu arrestatu Richard Perez dettu « u rè di a rumènzula »… suspettatu d’esse à capu d’un tràfficu di 26 millioni d’àuri da u Gard è e Bouches-du-Rhône à a Spagna…
Dice l’Uffiziu centralu di lotta contr’à l’offese à l’ambiente è à a salute pùblica (OCLAESP), chì u nùmaru d’infrazzioni in Francia in lea cù i lozzi hè cresciutu di 85 % trà 2017 è 2021. U tràfficu rende ingordu. I scrucconi sò belli urganizati, dice l’OCLAESP, « sò sucietà chì si prisèntanu à i pruduttori di lozzi cume essendu capace di ricuperali, di traspurtali è di trattali. Invece, spessu l’abandònnanu ind’è a natura » o i rivèndanu, fendu doppiu benefiziu. Dice torna l’OCLAESP ch’ellu ci sarìa 36.000 scàrichi salvàtichi, quant’ellu ci hè cumune in Francia ! L’affare, avemu capitu, hè fàciule è raporta ! Ùn hè per nunda sè a màffia s’interessa di più in più à stu marcatu. U rìsicu pè u tràficu di droga hè di 30 anni di prigiò. Pè u tràfficu di lozzi in banda urganizata hè solu di 7 anni ! •