Aspetteremu u bilanciu d’aostu, è si spera in quellu di sittembre, ma quellu di lugliu ùn hè statu bonu, trà menu 12 à 36 % dice l’UMIH secondu à i settori. L’Unione di i mistieri è di l’indùstrie di l’osterìa parla d’un tràfficu passageri in crèscita ind’è l’aèreu, ma una zituazione gattiva pè i prufessiunali, osterìe, risturanti, pruduttori, cumerci cù una frequentazione chì cala è turisti chì spèndenu di menu. È i primi ghjorni d’aostu anu cunfirmatu stu gattivu bilanciu… umbeh ! Una cosa hè sicura, a pupulazione, ella, ùn ne pò più. È micca solu in Corsica. U turìsimu ùn si loda più è e regioni chì ne campàvanu sinament’à avà bràmanu di sviluppassi altrimente. Pèsanu svantagi è incunvenienti, crèscita di i prezzi è di e pigioni, speculazione, alloghji chì màncanu pè e residenze principale di l’abitanti per vìa ch’elli sò riservati à i turisti, pulluzioni, lozzi in soprapiù, marine privatizate, scòmudi, rimori, infrastrutture chì còstanu, acqua frazata è scarsighjata… si lagna a ghjente in tutta l’Auropa.
In Spagna, sò di più in più numarosi e manifestazioni contr’à u turìsimu di massa, pè u più e regioni autònome chì sò e più attrattive… in Barcelona, Majorque, e Canarìe… si multiplichèghjanu i culpacci contr’à i turisti, innacquati nant’à e terrazze di cafè, burlati cù affissi buciardi di perìculi inventati, tràmpali per impedìsceli d’entre in certi lochi… « Malaga per campà micca per sopravive » dìcenu e banderole di i manifestanti dinù in Malaga o Cadix (Andalusìa)… In 2023, a Spagna hà cuntatu 85,1 millioni di turisti (12,8 % di u PIB è 12,6 % di l’impiechi).
In Grècia dinù, a pupulazione ùn ne pò più di a surfrequentazione. In Paros, ìsula di 12.000 abitanti, i manifestanti rivendichèghjanu u drittu di bagnassi in u mare di a so zitellina. Sò 450.000 à invade e marine affucate sott’à i parasoli è i transat di risturanti in bordu di mare, stallati senza autorisazione ! Athena prova à regulà e vìsite di u Parthenon cù ore imposte in u bigliettu d’entrata. Ma ùn basta micca à riduce u flussu cutidianu di i turisti.
À u Montenegro, anu decisu di reduce di 50 % i battelloni di crucere, è l’Unesco minaccia di caccià u statutu di Patrimoniu mundiale à a cità medievale di Kotor. 22.600 abitanti suppòrtanu battelloni chì spùtanu nant’à u so portu 10.000 turisti à u ghjornu… Sò dui millioni ogni annu i turisti chì visìtanu u Montenegro chì conta 600.000 abitanti, quasi quatru volta di più. È l’attività raprisenta più d’un quartu di u PIB di u paese.
In Venezia dinù, l’abitanti manifestèghjanu per prutege a cità chì soffre di più in più di i millioni di ghjente chì sbàrcanu. L’autorità pròvanu à regulà fendu pacà l’entrata di a cità. Una goccia d’acqua ind’è u mare ! Ci hè 73,8 turisti per ogni abitante in Venezia !
Barcelona hà accoltu più di 15 millioni di personi in 2023, s’aspettàvanu di più in 2024… è i Catalani riendichèghjanu una vera regulazione.
Pensà e cose micca in funzione di u prufittu, ma di u benestà di a ghjente chì ci stanu. A qualità di vita di l’abitanti deve esse una priurità di e pulìtiche. Vale à dì, di u turìsimu, un tantu chì basta, ùn sì pò accoglie senza lìmita è ci volerà cunvìncesi chì per salvà l’attività turìstiche, ci volerà regulà a frequentazione, è impone forse quotas cum’è in l’ìsula di Porquerolles. •