Edmondu si n’hè andatu per sse machje fiurite quassù in Paradisu. U dulore hè immensu pè a so famiglia, è per noi tutti chì ci hà allevatu à tutti dapoi 60 anni ch’ellu accumpagna e lotte di u pòpulu corsu. Pochi sò l’omi à marcà parechje generazioni à tempu. Oghje in Corsica, simu parechji à sèntesi urfanelli. U sapìamu faticatu, ma ùn la vidìamu. Edmondu era un roccu eternu per noi tutti è pochi rimarcàvanu a so dimarchja mal’accertata. Ghjè perchè ellu era un travagliatore instanchèvule pè a càusa corsa. Scrivìa, chjamava, richjamava, urganizava dibàttiti è riflessioni, mandava messagii, sullicitava, seguitava e rete suciale quand’ellu vidìa una fottò, un infurmazione chì l’interrugava, sùbitu sùbitu vi dumandava ciò chì nè era, è dava cunsiglii per accuncià e cose… Ancu da u so lette d’uspidale, ùn piantava, cù i so cartulari, e so note, i so marcatori gialli per sottulineà e frase impurtante da ritene…
Era cusì Edmondu, à l’agguattu di a mìnima infurmazione, prontu à parte ! È avà ch’ellu ùn ci hè più, ssa presenza immensa scava un viotu tamantu. Era toccu da tutte l’inghjustizie è si dava di rimenu per tutte e càuse, ancu puru s’elle ùn cuncernàvanu a Corsica, cum’è l’affare di u pìcculu Karama, un zitellucciu djibussianu adduttatu da un coppiu chì stà in Metz ma ch’ùn ghjunghje à avè un visà per entre in Francia cù i so parenti. S’hè datu di rimenu per aiutà ssa famiglia è l’associu chì l’aiuta.
In quant’à a Corsica, Edmondu dumandava nutizia à tutti è s’impegnava per tutti. Hà fundatu Corsica Diaspora, partecipatu à a creazione è à a crèscita di Femu Quì, animatu u Cullettivu contr’à u focu, u Cullettivu Lingua Viva, u Cumitatu corsu pè a Salute, u Cullettivu contr’à a precarità è a Puvertà, i Cullettivi Corsi di Lotta per l’ecunumìa, u cullettivu per un statutu fiscale, u cumitatu di sustegnu à Yvan Colonna è n’hà sustenuti tanti è tant’altri pè i prigiuneri, contr’à u razzìsimu, pè a lingua corsa è per tutte e lotte ecunòmiche è suciale, o ambientale cume u Cullettivu pè a Lege Liturale, u cumitatu Zeru Frazu, u Cumitatu contr’à u Padduc sott’à a mandatura Rocca Serra è per un veru Pianu d’accunciamentu pè a Corsica. S’impegnava dinù assai per Umani, a fundazione di Corsica. Era un diffensore arrabiatu di a vita, u diàlogu, a cuncertazione. Edmondu era di tutte e nostre lotte, purghjìa a manu à tutti, inditava suluzioni sempre in u stessu filu ch’hà custruitu a so vita : a difesa di u pòpulu corsu è a demucrazìa. Edmondu si fecia assai penseru pè a Corsica, è forse u so core n’hà suffertu. Si n’hè andatu, ma u so messagiu ferma vivu, cum’un fanale ind’è a notte. U ci hà lacatu cum’è làscita, dumandènduci di marchjà drittu. Ùn si pudìa parlà megliu di ellu chì cù e so parulle pròpie chè no avemu vulsutu ramintà quì, in qualchi sprichji di a nostra stòria di ssi sessant’anni di lotta.
Arritti hè prufundamente adduluritu. Basgiemu affettuosamente à so moglie, Lucia, i so figlioli Giliu è Marcu, i so figliulini, u so fratellu caru Màssimu, tutti i soi ind’è l’afflittu. Ripusate in santa pace o zì.
Fabiana Giovannini.