« Eru morta dentru di mè » dice Marion ch’hè stata sfruttata sessualmente da 15 à 18 anni… Marturiata da u so maccarellu, ùn pudia fughje. U straziu hà duratu trè anni. Hà avutu a scenza di pudè sòrtesine. Micca tutte anu sta furtuna… Oghje a spluttazione sessuale di e minore hè in crèscita tremenda in Francia. Secondu à e statìstiche sò 10 volte di più chè cinqu’anni fà. Raporti diffìciuli cù i so parenti, Marion hè discularizata à 15 anni, piazzata in una casa d’adulescenti, ùn hà più riferimenti, hè vulneràbile, scontra nant’à e rete suciale un omu di 25 anni è tuttu capicciuteghja. « À u nostru primu scontru, mi trovu di pettu à un omu chì parla forte è face 2,08 metri, cù un filmu pornò in vittura è una mansa di biglietti in e calzette. Ùn sò più cumu fà. Mi porta in un albergu… » Marion hè viulentata parechje volte, prova à fughje ma ùn ci ghjunghje. « À longu ci hè cum’una lavatura di cerbellu, ùn sapete più ciò ch’hè bè o male, site imprigiunata psiculugicamente, eru morta dentru di mè. Ùn risentìa più nunda. » Marion hè chjosa parechje settimane cù ssa persona, chì a pìglia à calci è pugni per dumala « site cumplettamente desumanizata, à subisce cose streme, u cerbellu face una spècia di black-out è site ubligata di mèttevi in modu off » dice torna a ghjuvanotta. Frasturnata, manghja pocu, sò parechji l’omi pronti à pacà caru per avè raporti sessuali cù una ziteletta… Hè dinù un mondu di droga, d’alcollu, di viulenza permanente induve ùn ci hè più piazza à a rivolta. Frà i clienti, ci sò duttori, banchieri, « ùn avete più cunfidenza ind’è l’umanu, ind’è l’adultu » dice Marion. U so maccarellu hè arrestatu ma u so fratellu piglia a sèguita. Ancu assai, a zitella finisce per porghje lagnanza, hè arrestatu ancu ellu è tremindui sò cundannati. Ma ùn ci hè nisun presa in càrica di Marion, ùn hè micca trattata cum’una vìttima è deve imparà à ricustruìscesi sola. « Mi sentu brutta, pigliu sin’à trè bagni ind’è a ghjurnata » spieca a ghjuvanotta. Marion ùn s’ama micca è li ci volerà tempu per ritruvà una vita nurmale. D’altre càmpanu decine d’annate ssa vita ch’ùn anu micca sceltu. A prustituzione principia spessu cusì, cù un raportu sessuale furzatu è una duminazione maschile. E donne ciòttanu ind’un infernu da induve ùn ponu sorte. A prustituzione hè una viulenza contr’à a donna è ùn pò esse cunsiderata cum’un mistieru induv’ellu si ponu mette règule, cum’è a pènsanu a maiò parte di l’omi è di a sucietà.
Cathy hà fattu ssa scelta di vita per vince soldi più facilmente. Quand’omu li dumanda s’ella pigliarebbe a stessa strada oghje, risponde : « Ah nò ! A prostituzione hè una catastrofa. I clienti anu di menu soldi è ci sò di più in più prustituati. A vita, a disuccupazione, a droga, tutti sti prublemi cundùcenu assai donne è omi à a prustituzione… Ùn ci hè più rispettu di u corpu, fate què n’importa cumu, per n’importa chì prezzu… » Cathy hè traumatizata, hè stata minata è hà piantatu sta vita. Dice anch’ella ch’ùn ci hè nisun aiutu per sorte di ssa vitaccia : « S’avìa una figliola, sè pudìa dalli un cunsigliu per ùn cascà ind’è a prostituzione, sarebbe a prima à aiutala ind’un altru caminu, a prustituzione ùn hè una suluzione. »
« Un omu m’hà ubligatu. Eru talmente stumacata ch’eu vulìa tumbami. Avìa a vergogna » spieca Linda e làcrime à l’ochji. « E donne si prustituèghjanu sin’à a morte perch’è ùn ci hè mezu di sòrtesine. » Ghjè un incricca. Vulè regulà a prustituzione hè vulè mantene sse donne ind’u martoriu. Ùn si pò guarisce di e viulenze fatte à e donne s’omu cuntinueghja à cunsideralle cum’è ogettu sessuale, in casa o in carrughju a viulenza principia cusì. •