Ancu sè u parlamentu aurupeu hà vutatu contru a pruposta di lege nant’à i pesticidii di nuvembre scorsu, l’affare ùn hè compie per pruvà di salvà l’ape è l’insetti pullinisatori… A Belgica piglierà a presidenza di l’Unione da quì à pocu è travaglia à una nova strategìa per riduce i rìsichi di i pesticidii. S’ella ùn ci ghjunghje, s’hà da sfundà a biodiversità in a nature è a salute di a ghjente incù ella ! I difensori di l’ambiente chjàmanu i citatini à scrive à i so guverni da ch’elli tròvinu una suluzione per fà piantà l’usi di i pesticidii ind’è l’agricultura, cum’è u glifusatu ch’hè l’erbicidiu u più utilizatu in Auropa, è dunque u più gattivu per l’ambiente. U retale PAN Europe (Pesticide Action Network) è uni pochi d’altri chì scumbàttenu contr’à u glifusatu appròntanu un prucessu per fà valè a mansa d’infrazzioni custatate à a legislazione aurupea. A Cumissione aurupea hà datu u s’accunsentu per 10 anni d’utilizazione in più allora ch’ùn si còntanu più i studii è l’inchieste sèrie è indipendente chì dinùnzianu i so perìculi pè a salute di a ghjente, di a biodiversità, di a terra, di l’acqua… E prime vìttime sò l’agricultori. Allora, di vede l’agricultori di a FNSEA dumandà di pudè cuntinuà à pulluà cù i pesticidii, pare fola tamanta à u mondu ! PAN Europe è l’urganisazioni di Générations Futures, Global2000, PAN Allimagna, PAN Ullanda, è Client Earth anu decisu ancu assai d’attaccà sta decisione à u tribunale. Di pettu à elli, anu e multinaziunale cum’è Bayer-Monsanto è d’altri industriali chì si n’impìppanu di mette in perìculu a natura. Ponu quantunque fassi penseru, di nuvembre scorsu Bayer-Monsanto hè statu cundannatu in u Missouri à pacà 1,5 milliarda di dòllari à trè parsoni cuntaminate da u Roundup. Sti trè disgraziati anu chjappu un càncaru gattivu, un linfomu non-hodkinianu, dopu à avè durante parechji anni utilizatu u Roundup per pullisce u so giardinu… Peghju, stu 24 di ghjennaghju, u tribunale di Philadelphie hà cundannatu Monsanto à pacà 2,25 milliarde di dòllari à un omu ch’hà chjappu u stessu càncaru. È Bayer deve dà di pettu torna à 40.000 prucessi cum’è quessi ! Novethic, un situ specialista in ecunumìa, dicìa pocu fà chì Bayer avìa persu a metà di u so corsu in Borsa…
In Auropa, e cundannazioni sò più scarse. Puru, in Francia dinù, u Fondu d’Indennizazione di e Vìttime di i Pesticidii (FIVP) hà ricunnisciutu a lea trà a malfurmazione d’un zitellu in corpu à a so mamma ch’era stata esposta à l’erbicidiu Glyper. U zitellu, Théo Grataloup, ch’hà oghje 16 anni, hà una malfurmazione di a trachea è l’esofagiu. In 2018, hà attaccatu Novajardin chì pruduce Glyper è Monsanto chì li furnisce u glifusatu. Sò stati cundannati à pacali 36.000 auri. Ogni annu, si conta 385 millioni di cuntaminazione à u glifusatu, secondu à l’associu Reporterre. U glifusatu hè ricunisciutu per pruvucà càncari cum’è i linfomi, i mielomi, e leucemìe, i càncari di a prustata, è ancu càncari di u cerbellu. Frà e prime dumande ch’elli fàcenu l’oncologhi à i so malati, ci hè : « chì mistieru vo fate ? Site agricultori ? Utilizate prudutti fittosanitarii ? »… Ghjè dì quantu a decisione di u Parlamentu aurupeu di nuvembre scorsu hè stata una catastrofa. Ghjè dì dinù quant’elli so incuscienti per elli è pè i so zitelli, l’agricultori chì dumàndanu da pudè cuntinuà à utilizà u glifusatu o altri pesticìdii. •