U Nobele di a Pace hè una donna. È una donna in prigiò per avè vulsutu difende a demucrazìa. Narges Mohammadi, 51 anni, hà amparatu a nutizia da u fondu di a so càrcera in Téhéran, in a sinistra prigione d’Evin induv’ella hè chjosa dapoi u 2021. Ghjurnalista, militente di i diritti di a donna, vicipresidente di u Centru di i difensori di i diritti di l’Omu, hè stata premiata u 6 d’ottobre « pè u so cumbattu contr’à l’oppressione di e donne in Iranu è a so lotta pè a prumuzione di i diritti umani è a libertà per tutti » hà annunziatu a so famiglia. Narges Mohammadi hè stata parechje volte imprigiunata s’ùltimi 25 anni, per avè luttatu contr’à u velu ubligatoriu pè e donne è contr’à a pena di morte in Iranu. A televisione ufficiale di u Statu s’hè inzerghita di st’annunziu di u Cumitatu Nobele. U Statu islamistu iranianu hà rimpruveratu « una decisione parziale è pulìtica ». « Sò assai fieru è felice » hà dettu u so figliolu di 15 anni chì campa in Parigi in esiliu dapoi 8 anni cù u so babbu è a so surella. « Hà da esse diffìciule per ella ma hè curagiosa è assuma u rìsicu » dice u so maritu, dinù militente di i diritti di l’Omu è anzianu prigiuneru pulìticu. « Narges Mohammadi sparghje dapoi parechji anni tutta a so energìa per fà sapè a situazione pèssima pè i diritti umani in Iranu. Dapoi a so cèllula, hà cundannatu a ripressione contru à e manifestazioni è hà chjamatu à abulisce a pena di morte è à impedisce u piazzamentu in isulamentu. Hà dinunziatu dinù e viulenze sessuale fatte à e manifestante imprigiunate » hà cummentatu Agnès Callamard, secretaria generale d’Amnesty Internaziunale. « In una dimarchja crudele chì dice l’inumanità in core di i mètodi per punisce e voce chì s’àlzanu per criticà u regime, l’autorità iraniane maltràttanu Narges dapoi anni, tortura, minaccie di morte, privazione di i curamenti medicali… è l’impedìscenu di vede i so dui figlioli. Malgratu stu prezzu à pacà, l’azzioni per impedìscela di parlà è a perspettiva d’una vita in prigiò, Narges Mohammadi cuntinueghja cù curagiu à dumandà u cambiamentu, per tutte e donne, tutti l’omi è tutti i zitelli d’Iranu. »
Di sicuru, sta ricunniscenza di u cumitatu Nobele hè un incuragime maiò à Narges ma dinù à tutte e donne è tutti l’omi chì sòffrenu è scumbàttenu oghje pè a libertà in Iranu. Ghjè un messagiu chjaru à l’autorità per dilli ch’elli sò in mira di a cumunità internaziunale. « A cumunità internaziunale deve mubilizassi sùbitu pè a liberazione senza cundizioni di Narges Mohammadi è di tutte sse donne è ss’omi incarcerati di manera inghjusta, solu per avè, senza viulenza, fattu valè i so diritti in u filu di u muvimentu Donna, Vita, Libertà dapoi u 2022 » hà dettu torna Amnesty Internaziunale.
Narges Mohammadi hè stata cundannata à 11 anni è 11 mesi di prigiò, è à 154 colpi di staffile…
Pò diciulà quant’ellu vole u regime di i Mollah, a so trista prigione d’Evin conta oghje un Premiu Nobele di a Pace è per l’Iranu ghjè una gattiva publicità di più. Ssu prèmiu ricumpenseghja d’una certa manera à tìtulu postume a corcia Mahsa Amini, assassinata da u regime, è tutti l’omi è e donne assassinate incù ella per avè vulsutu campà lìberi è degni.
Hè un prèmiu pè u mughju « Donna, Vita, Libertà » in u mondu sanu.
Curagiu è forza Narges. Venerà l’ora di ssa libertà tantu bramata. •