A settimana scorsa si cummemurava l’ottant’anni di a spulicata di u Vel d’Hiv. U 16 è u 17 di lugliu di u 1942, 13.152 omi, donne, zitelli, sò arrestati da a pulizza francese, purtati à u Vel d’Hiv, ammansati quì parechji ghjorni in cundizioni tremende, pò aggruppati in i campi francesi di Drancy, Pithiviers è Beaune-la-Rolande, per esse infine mandati in i campi di sterminazione nasì, pè u più u campu d’Auschwitz-Birkenau. Solu una centinaia vulterà di ssi campi di a morte. Tempiu di u sport francese à a glòria di u ciclìsimu à quell’èpica, u Vel d’Hiv hè vultatu in qualchi ghjornu a vergogna di a Francia à l’ochji di u mondu è di tutte e generazioni à vene. Hè statu struttu quindeci anni dopu in u 1959. È ci hè vulsutu aspettà 50 anni, in u 1993 per chì un presidente di a Repùblica, François Mitterrand, posti fiori in umagiu u ghjornu di a cummemurazione di sta spulicata, pò torna 2 anni, in u 1995, per chì un antru presidente, Jacques Chirac fessi u mea culpa di a Francia, ricunniscendu a rispunsabilità di u Statu francese. U Vel d’Hiv raprisenta u più mullizzosu di a cullaburazione francese durante a seconda guerra mundiale. L’operazione sott’à a rispunsabilità di u guvernu di Vichy di Philippe Petain è Pierre Laval, hè stata cummandata da i nasì è chjamata « ventu veranile » (sic). Hè cundutta da u secretariu generale di a prefettura, René Bousquet. Per dì u spìritu stortu di i nasì ch’anu fattu fà u travagliu bruttu à a pulizza francese. U scopu era di stirpà i ghjudei d’Auropa, a Francia occuppata era stata scelta per dà u primu slanciu di sta stirpera. I nasì avìanu dumandatu l’arrestazione di i 25.000 ghjudei stranieri riscensati in Parigi (allemani, pullunesi, austriani, russii…) ; una lista appruntata da u prefettu di pulizza André Tulard chì conta 149.734 nomi in tutta a Francia occuppata… Vechji, donne incinte, zitelli ùn duvìanu esse arrestati, mà ind’è l’azzione è cù l’odiu, e cunsigne ùn sò micca rispettate. Frà i 13.152 personi arrestate, 4115 èranu zitelli, tutti morti in i campi, 5919 donne, 3118 omi, ghjudei stranieri ma dinù francesi. Ancu assai, parechji chì duvìanu esse arrestati sò riesciuti à scappà. Ammansati l’uni sopra à l’altri ind’è u Vel d’Hiv, fèrmanu senza acqua, senza medicamenti, senza pulizìa, senza letti, senza di chè manghjà o beie, in un calore tremendu, accecati da lumi putenti per survegliali, à mezu à i mughji è i pienti di i ciucci, i malati, e donne incinte, u spaventu è u terrore, parechji si suicìdianu. Sò quatr’ore di mane quandu i 9000 pullizzeri si spàrghjenu in i quartieri ghjudei à tamburinà à e porte di sta corcia ghjente. S’hè parlatu assai di u Vel d’Hiv, mà l’arrestazioni ùn si sò piantate quì, a cullaburazione trà u guvernu di Vichy è a gestapò si rinforza tandu è sò più di 75.000 i ghjudei chì sò stati depurtati durante a guerra. U ghjurnale antisemistu Le Cri du peuple scrive u 3 di lugliu : « Per cunvìncesi di u perìculu ghjudei, basta à spassighjà un quartu d’ora a dumènica trà a Madeleine è a piazza di a Repùblica. A prupurzione di i decurati di a stella gialla franca tuttu ciò ch’omu pudìa pensà è ancu u più stùpidu di i gullisti finisce per dì : sò veramente troppu ! »
L’operazione di u Vel d’Hiv finisce di spiccà a pupulazione francese, uni pochi si radicalizèghjanu è divèntanu antisemisti, l’altri – parechji ancu assai – raghjùnghjenu a resistenza. •