Dui anni ch’ella duri a guerra in Ucràinia. Sò centinaie di millaie di morti da parte è manca. Ma i sciffri precisi ùn si cunnòscenu chì sò càuse di propaganda per l’uni cum’è l’altri… Secondu à l’osservatori internaziunali, trà morti è feriti, sò stimate à 200.000 e vìttime ucràiniane, è più di 300.000 e vìttime rùssie. L’armata rùssia, cù e so forze aèree quasi 10 volte più putente è a so artiglierìa tremenda, hà ingagiatu un « operazione militare speciale » cù bumbardamenti da tutte e mamme è invasione militare di e principale cità ucràiniane di ferraghju 2022. Puru a resistenza eròica di l’ucràiniani hà surpresu. È e pèrdite umane è materiale rùssie sò state numarose. L’Ucràinia resiste. Vistu sta resistenza, Americani è Aurupei li pòrghjenu aiutu dapoi dui anni, cù arme è munizioni à pezzi è à buccò. Ma dinù sanzioni ecunòmiche. In 2023, l’espurtazioni rùssie versu l’Auropa anu calatu di 68 %. Ma a Russìa ghjunghje à addattassi. È hà l’aiutu oghje di a China, è a Corea di u Nordu. Forte d’un bugettu militare di più di 110 milliarda, d’una riserva d’omi à mubilizà trè volta di più numarosa, è d’una pruduzzioni di munizioni assai più operaziunale, a Russìa pò piglià a suprana. Oghje i suldati ucràiniani sò custretti à rinculà per vìa di u mancu d’obusi.
Di ghjennaghju 2024, si cuntava dinù 6 millioni di rifugiati ucràiniani in Auropa. Pè u più in Pologna, quasi un millione, quasi 70.000 in Francia, più d’un millione dinù in Allemagna, è più d’un millioni torna russoffoni partuti in Russìa.
In Corsica, un associu hè statu creatu in sulidarità da pudè accoglie ind’è l’ìsula, per un tempu, o di più, Ucràiniani chì fùghjenu a guerra. Cusì, mamme di famiglia, studienti, pròvanu à sfiatà ind’è noi. Eppò l’associu arricoglie quì soldi è materiali ch’abbisògnanu l’uspidali, e scole, l’amministrazioni ucràiniani da pudè cuntinuà à mantene à vita culandi.
Nant’à a pàgina Facebook di l’associu Solidarité Corse-Ukraine, ugnunu pò truvà infurmazioni è vede cumu aiutà à mandà letti medicali, medicamenti, materiale da tutte e mamme per sustene l’Ucràiniani.
Stu 10 di ferraghju, nant’à stà pàgina, una fottò mostra una donna ch’hà persu u so figliolu, a so nora è i so trè figliulini chjuchi, in traccia di fassi piglià u so ADN da pudè identificali… Dice l’associu « pudete imaginà ciò ch’una mamma deve risente quand’ella deve fà stu testu ADN per fà ch’omu possi identificà a salma di u so zitellu brusgiatu ? Hè impussìbule di risente u dulore d’una mammona ch’ùn viderà mai più cresce i so figliulini »…
Eccu u cutidianu di a guerra in Ucràinia dapoi dui anni. Un antra infurmazione nant’à sta pàgina sparghje di più speranza. Hè una videò chì mostra a catena di sulidarità ch’ella hà pussutu mette in ballu l’associu per urfanelli. Ghjè una distribuzioni di rigali per 140 pìcculi ucràiniani ch’anu ricevutu rigali da a parte d’elevi di una scola aiaccina. « Carcamentu di u mo pickup da l’elevi ch’anu decuratu elli stessi i sacchettucci di rigali. Rimessa di i rigali in Ucràinia à l’Urfanelli ch’anu intricciatu in ritornu braccialetti à i culori di l’Ucràinia per dalli à l’elevi… » cumenta un rispunsèvule di l’associu. Aiutèmulu. •
Fabiana Giovannini.
Solidarité Corse-Ukraine : https://bit.ly/42Flmrf