Ssu mondu hè diventatu scemu. S’hè vistu pocu fà ind’un grande media, un prufessore di rinomu, dettu « emeritu », dì ch’ellu tocca à quelli ch’ùn sò vaccinati di ziffrà un attestazione di ricusu di presa in càrica in reanimazione s’ella li accade di chjappà u Covidacciu… Oltre ch’ellu si scorda u ghjuramentu d’Hippocrate, u sgiò prufissore Grimaldi dice à altu voce ciò ch’elli sò cundutti à fà oghje i « suagnenti »… Dice nant’à u ghjurnale La Tribune à prupòsitu di a scelta diffìciule à fà quand’ellu ùn ci hè chè un lettu per dui malati chì dèvenu andà in reanimazione : « U quale deve avè a priurità ? Sò i suagnenti chì decìdenu di manera cullegiale ma duverìa esse à e sucietà sapiente, à l’agenze indipendente, à i cumitati d’èttica è, aldilà, à a sucietà sana è à i so eletti di dibatte di i principi chì dèvenu indità i suagnenti. Frà ssi principi deve figurà a quantità di vite salvate per raportu à i mezi mubilizati, sapendu bè chì u tempu medianu d’un sughjornu in reanimazione di i malati in generale hè di quattru o cinque ghjorni quand’ellu hè di dui à trè settimane pè i malati Covid. Ste reanimazione longhe ingàgianu u prunusticu vitale di i malati è per schivà u custatu cutidianu di “i malati chì ghjùnghjenu in un gattivu statu cù u rigrettu d’avè presu a decisione incuscente d’ùn fà u vaccinu”, sarebbe una bona di cunsiglià sistematicamente à tutte e personi maiò ch’ùn vòlenu u vaccinu di scrive bellu nanzu direttive per dì s’elli vòlenu o nò esse rianimate in casu di forma grave di Covid. Una persona rivendichendu a scelta lìbera d’ùn fà u vaccinu ùn duverebbe micca assumà in cuerenza a scelta lìbera d’ùn fassi rianimà ? »
Chjìbbà ! Saetta ! Invece di vultassi contr’à e restrizzioni bugetarie di tutte l’annate scorse contr’à l’uspidali, u prufissore chì sicuramente ùn ne pò più di fà sse scelte, si ne piglia à a corcia ghjente cascata malada… L’artistu rap Akhenaton face rimarcà ch’ellu hè cumu dumandà à i diabettichi di ziffrà a stessa attestazione s’elli mànghjanu zuccheru più chè di raggione ?? Di fà dinù ziffrà un attestazione di non presa in càrica in reanimazione à i cunsummatori di sigaretta ch’ùn stanu à sente à e ricumandazioni di piantà di fumà (150.000 morti sti dui ùltimi anni) o à i cunsumatori d’alcollu chì cuntinuèghjanu à beie malgratu u perìculu pè a so salute (100.000 morti sti dui anni dinù) ?? Stu mondu hè diventatu veramente scemu ! Hè bellu luntanu u tempu induve tutt’ugnunu sciaccamanava carcu à ricunniscenza i suagnenti chì s’impègnanu notte è ghjornu per curà a ghjente. Hè bellu luntanu u tempu induv’omu parlava di « u mondu di dopu » più sulidariu, invece chì quellu di nanzu hè vultatu bellu impeghjuritu ! Duttori pèrdenu u cerbellu, d’altri sò messi da cantu. Cumu spiecà chì i suagnanti ch’ùn sò vaccinati, ma puru testati negativi à u Covid, ùn ponu più curà a ghjente à l’uspidali o ind’i so cabinetti, è suagnanti chì sò vaccinati ma testati pusitivi, sò invitati à travaglià listessu ?? Cumu si face ch’omu impedisce i cuncerti di qualchi centinaie di personi, o impone una lìmita di 5000 personi in i stadii di 60.000 piazze pè i scontri di ghjocu à pallò quand’omu permette meeting pulìtichi di parechje millaie di ghjente senza lìmita, strinti è accatastati cum’è anchjuve l’uni contr’à l’altru ? Cumu raggiunà u pòpulu ch’hà a paura di u vaccinu s’omu l’indita è u spiata, caccièndulu i dritti citatini, tuttu pigliandu decisioni incuerenti è cuntradittorie ? Ssu mondu hè ghjuntu scemu. •