« Oghje, hè u mo 73u ghjornu d’incarcerazione à a prigiò di Nuuk è a quarta cumparuzione di fronte à u tribunale di u Groenland. Cume a m’aspettava, u ghjùdice hà ricusatu i documenti è l’argumenti di i mo avucati è hà ordunatu 28 ghjornu di detenzione in più. Vale à dì 91 ghjorni per un accusu senza fundimentu è un delittu minore chì si ne colla à 14 anni fà è à u quale ùn aghju micca partecipatu. » Eccu ciò ch’ellu scrive Paul Watson da u fondu di a so prigiò u
2 d’ottobre scorsu. A so detenzione hè stata prulungata sin’à u 23 d’ottobre. Li hè rimpruveratu d’avè mandatu militenti à fà fronte à balinieri. Unu sarìa statu feritu, brusgiatu da u butiru di balena ch’ùn hà nisun prupietà periculosa fora di puzzà… In vera, frà i militenti ci era u prupietariu di u battellu chì i balinieri anu struttu è ch’era ghjuntu (contru à a vuluntà di Watson ch’ùn ci era micca) à purtà a fattura à i balinieri. I balinieri li anu lampatu gasu di pèveru chì li hè vultatu in faccia per vìa di u ventu. Hè cusì chì u balinieru hè statu brusgiatu senza gravità. A difesa di Watson hà documenti è videò chì pròvanu i fatti ma a ghjustizia groenlandese ricusa di pigliali in contu. St’affare, accaduta 14 anni fà, era l’uccasione pè u Giappone di fà valè u so mandatu d’arrestu internaziunale da pudè sbarrazzassi di Watson… Eccu u fondu di stu cartulare ch’ùn ghjustificheghja in nunda a detenzione di u capitanu, allora chì ghjè u Giappone ch’ùn rispetta micca e règule internaziunale d’interdizzione di a pesca à a balena. U Danemark anch’ellu interessatu da a pesca à a balena per vìa di u massacru di i delfini dinunziatu ogni annu ind’è l’ìsule Feroé, hà prufittatu di a presenza di Watson à u Groenland per arrestalu. Face quasi trè mesi ch’ellu hè in prigiò, cù u rìsicu d’esse stradatu à u Giappone induv’ellu incorre a prigiò pè a vita chì li ferma à l’età di 73 anni… I sustegni sò maiò ma ùn bàstanu à u livellu ufficiale per mette a pressione nant’à u Danemark è u Giappone. Petizioni anu racoltu centinaie di millaie di ziffre per dumandà a so liberazione. Watson è a so difesa dinùnzianu « una parudìa di ghjustizia ».
« U mo cartulare hè pulìticu è u guvernu giappunese ci mette tuttu u so pesu » dice Watson, « aghju sempre pensatu chì difende a pianetta hè una càusa chì vale a pena di risicà a so vita. Sò chì s’eu sò mandatu à u Giappone, ùn vulteraghju mai… I Giapponesi ùn mi pardònanu micca d’avè mustratu à u mondu sanu a so caccia illegale à e balene ind’è l’oceanu antàrticu à traversu a serìa televisiva Whale Wars. Dapoi u 2012 pròvanu à fammi pacà. » E prigiò giappunese sò dure è ùn rispèttanu micca i dirititi di l’omu, sopratuttu contr’à l’attivisti stranieri.
A dinunzia di manera regulare a Federazione internaziunale di i diritti di l’Omu.
Quandu Watson circava d’impedisce u travagliu d’un balinieru in u 1975, a balena ferita s’hè avvicinata di u so battellu pnemàticu è pudìa tumbalu cum’è nunda. « Aghju guardatu l’ochju di a balena è aghju vistu ch’ella capìa ciò chè no pruvàvamu à fà. Aghju vistu u sforzu ch’ella hà fattu per spargnà e nostre vite è vultà ind’è l’oceanu. Sò statu scambiatu per sempre. Sò per mai debbitore di a nazione di e balene » dice Watson.
Ziffrate a petizione : https://seashepherd.fr/petitions/petition/10/ •