Yassir

Natu in principiu di ssu mese di marzu, Yassir hè un miraculatu. « Eiuvulia tumbami » conta a so mamma, una ghjuvanotta di 20 anni. «Eiu è ssa criatura chì crescìa in mè. Per prutègelu »… Ghjè u ghjurnale Le Monde chì conta a so stòria ssu 16 di marzu. Incinta di sette mesi, abandunata da a so famiglia, Smahane durmìa in carrughju, in Casablanca, capitale di u Maroccu. Ancu assai, hà truvatu un associu chì l’hà accolta, ella è tutte e donne cum’è ella, cascate incinta fora di u matrimoniu. L’Istitutu naziunale di sulidarità cù e donne in burina (Insaf) aiuta sse corcie donne, suvente zitellette, hà ricustruìscesi, furmassi, truvà un impiecu, di chè pudè allevà u so ciucciu è dà di capu à a sucietà maruccana chì e sputa è e perseguite. Certe sò assassinate. D’altre sò cundutte à tumbassi. 50.000 ciucci nàscenu tutti l’anni fora di u matrimoniu à u Maroccu. In un paese intullerente, induve a donna hè cunsiderata cum’un peccatu, ssi sbaglii di vita ponu esse tremende per sse donne casticate da e so pròpie famiglie è da l’autorità. Parechje apparturìscenu in secretu è si sbarràzzanu di u so ciucciu. Secondu l’associi, 24 ciucci sò abbandunati ogni ghjornu à u Maroccu è 300 cadàveri sò truvati tutti l’anni ind’è e rumènzule di Casablanca. Spaventate, suvente assai ghjòvane, tèmenu d’andà à purtà a so criatura ind’è e case d’urfanelli. A maiò parte si sò truvate incinta per vìa ch’elle sò state viulentate da omi senza vergogna.

Ssi corci ciucci ùn sò frutti di l’amore. À u Maroccu «e rilazioni fora di matrimoniu sò punite di priggiò è l’abbòrtulu hè difesu » dice u ghjurnale Le Monde.

«Quelle chì decìdenu di tènesi u so figliolu, dèvenu dà di pettu à l’agressività di a ghjente… Pruvemu à cambià u sguardu nant’à sse mamme sprezzate è inghjuliate » dice l’Insaf. Esse donna senza maritu ghjè un vìacruci, «i muvimenti stremi vòlenu facci smarisce, ma ùn cappieremu mai » dice torna l’Insaf.

Smahane hè stata mandata cum’è serva ind’una famiglia più ricca à l’età di 6 anni… marturiata, battuta, si ne scappa à 14 anni per rientre in casa soia. «Ùn aghju avutu zitellina. Ùn sò mai andata à a scola. Sò incapace di leghje pannelli in carrughju » conta torna Smahane. U so babbu in zerga a minaccia s’ella ùn riparte micca à travaglià per mandà soldi in casa.

Smahane si ne fughje in Casablanca per truvà un impiecu. Dorme fora, è trova un omu chì l’aiuta ma chì un ghjornu, imbriacu, a viulentèghja. Casca incinta.

«À u settèsimu mese, aghju vulsutu avvelenacci, u chjucu è eiu… tutta a mo vita, si sò chjose e porte. Ùn vulia micca ch’ella li accade listessu » Ancu assai, l’Insaf hà apertu a so porte à Smahane è u so pìcculu Yassir, cum’è à e 10000 donne chì l’associu hà aiutatu sin’à avà. 10000 ! È quantu ch’ùn hà pussutu aiutà ?

 

Fabiana Giovannini

1 Trackback / Pingback

  1. Stampa Corsa, informations corses – Yassir

Les commentaires sont fermés.