A prima audienza generale di l’annata di u Papa l’8 di ghjennaghju, s’hè fatta nant’à a spluttazione è a maltrattenza contr’à i zitelli. Francescu hà dinunziatu a sorte di i zitelli spluttati, feriti, umiliati da e guerre, u travagliu è l’abusi dapertuttu in u mondu. Di nuvembre scorsu, u Papa hà stituitu u 20 di nuvembre una Ghjurnata mundiale pè i zitelli, cù un cumitatu d’urganisazione di sta ghjurnata sott’à a rispunsabilità di u padre franciscanu Enzo Fortunato. Sta nova presa di parulla oghje palesa torna quantu u prublema hè pisìu in u mondu. A ghjesgia stessa hè stata inditata. In 2019, Francescu hà messu in ballu scontri nant’à l’abusi di u cleru ch’anu cunduttu à a creazione di a CIASE, Cummissione Indipendente nant’à l’Abusi Sessuali ind’è a ghjesgia. Hà resu u so raportu in 2021 chì dice ch’ellu ci sò omancu 216.000 vìttime di viulenze sessuale da membri di u cleru da u 1950 à u 2020. 330.000 s’omu conta l’abusi di i làichi travagliendu cù a ghjesgia. Oghje, a ghjesgia s’impegna à riparà tutte ste suffrenze. È Francescu cuntinueghja à dinunzià u male fattu à i cinnini dapertuttu in u mondu. « U sèculu chì arreca l’intelligenza artificiale è imagina esistenze multiplanetàrie ùn hà ancu presu a misura di u fragellu di a zitellina umiliata, spluttata, murtalmente ferita » dice u Papa. Hà annunziatu una cunferenza cunsacrata à i diritti di i zitelli u 3 di ferraghju pròssimu, chjamata « Tenìmuli caru, prutegèmuli » per luttà contr’à tutte e maltrattenze. Culpiti da a fame è a misèria, fragellati da e guerre, e statìstiche di sta suffrenza sò tremende. L’ONG Save The Children dice chì 473 millioni di zitelli crèscenu oghje in zone di guerra. « I discìpuli di Ghjesù Cristu ùn duverìanu mai permette chì i zitelli sìanu trasandati o maltrattati, privati di i so dritti,è ch’elli ùn sìanu micca amati è prutetti… i Cristiani anu u duvere di prevene seriosamente è di cundannà di manera ferma a viulenza o l’abusi contr’à i zitelli » hà dettu torna Papa Francescu. Hè un crìmine contr’à e nostre sucetà d’ùn fà nunda per cambià sta sorte mischina. « Un zitellu ch’ùn surride micca è ch’ùn sunnieghja micca ùn puderà cunnosce è sparghje i so talenti » dice torna u Papa chì dinunzia « un ecunumìa ch’ùn rispetta micca a vita » è « brusgia a nostra più grande riserva di speranza è d’amore ».
Secondu à l’Unicef 160 millioni di zitelli in u mondu sò custretti à travaglià dice torna u Papa. A so presa di parulla deve impenserisce tutte e stituzioni, aurupee, naziunale o regiunale. Perchè palesa una situazione insuppurtèvule di martorii cutidiani. A dice l’Unicef torna, trè zitelli nant’à quattru sò vìttimi di maltrattenza in u mondu. In Francia sò 200 ogni ghjornu. « Un sciffru alarmante chì ùn traduce micca tutta a realità di a situazione » dice torna l’Unicef. 300 millioni di zitellucci da 2 à 4 anni subìscenu regularmente viulenze fìsiche è psiculògiche. Più di 40.000 zitelli di menu di 18 anni sò assassinati ogni annu. 120 millioni di zitelle è di donne di menu di 20 anni sò vìttime d’agressione sessuale. Una donna nant’à cinque, è un omu nant’à 13 dìcenu avè suffertu di viulenza sessuale in a so zitellina…
In Francia, omancu 160.000 zitelli subìscenu viulenze sessuale ogni annu…
Ci sò troppu, troppu fatti cutidiani è crudelli contr’à i zitelli.
È a Corsica ùn hè micca risparmiata. Sè v’avete un dùbbitu di maltrattenza nant’à un zitellu, chjamate in fùria u 119. •