Una sucietà ch’ùn hè micca capace di prutege i so zitelli, chì ferma indiferente o ch’ùn agisce micca di pettu à e viulenze fatte à i zitelli, ùn pò micca esse detta demucràtica. In Francia, un zitellu more tutti i cinque ghjorni da viulenze di u so circondu familiale. Hè a ministra incaricata di a zitellina, Charlotte Caubel, chì l’hà detta, chjamendu à una presa di cuscenza. « A realità di i sciffri hè assulutamente inchietante è tragicu. L’infanticidii sò praticamente à paru di i feminicidii… i nostri zitelli sò in perìculu ». Si sprimava ind’i mèdia qualchi mese fà dopu à a publicazione d’un raportu di l’Ispezzione Generale di l’Affari Suciali, di a Ghjustizia è di l’Educazione naziunale. S’hè pocu sappiuta… È ghjè forse u primu prublema. Per cambià e cose, bisognu à parlanne. Bisognu à scuzzulà a nostra sucietà, bisognu à fà campagna per dinunzià i prublemi, fà a caccia à u lascia corre di certi servizii, è à u silenziu di quelli chì sanu è ch’ùn dìcenu nunda, ind’è l’amministrazione, o ind’è e famiglie. « U silenziu hè dinù una viulenza pè i cinnini è pò cunduce à i drama » dice torna a secretaria di Statu. In 2021, a pediatra, epidemiologista Anne Tursz, avìa fattu un inchiesta nant’à « e morte suspette di i ciucci di menu d’un annu ». Secondu à sta specialista di i zitelli maltrattati, ci sarebbe ogni annu in Francia 255 infanticidii di zitelli di menu d’un annu… è une poche d’altre morte sò piatte da l’accidenti dumèstichi, o u fattu chì sse creature sò tombe à a so nàscita senza chì nimu si n’avvede, o da u sindromu dettu di u ciucciu scuzzulatu. Ùn ci hè micca cuntabilisazione ufficiale di ste morte di cinnini. Ghjè dì e mancanze di a sucietà di pettu à ssu prublema. Una ghjurnalista, Marie Albert, hà apertu una pàgina Facebook induv’ella prova à ricensà e morte di i zitelli dati in i media. In 2022, 56 zitelli sò stati assassinati da una persona maiò. « Ssu sciffru hè sottu à a realità » dice Marie Albert, « sò centinaie d’assassinii ch’ùn sò micca mediatizati ogni annu… Ss’assassinati sò incuragiti da a nostra sucietà. A so urganisazione patriarcale, razzista è capitalista dà à e parsoni maiò u drittu di dispone di u corpu è di a vita di i zitelli. Dedicheghju sta pàgina à tutte l’esistenze arruinate da ss’infanticidii fatti ind’è l’indiferenza mediàtica, pulìtica è sucietale ». Ghjè dì quantu u fenòmenu di viulenza hè maiò. Per ghjunghje à ste statìstiche di malamorte, sò millaie i zitelli maltrattati di viulenze fìsiche o psiculògiche. È ci vole à aghjustà torna a maltrattanza sessuale. In 2018, secondu à u Statu, più di 23.500 zitelli sò stati vìttime di viulenze sessuale. In 2020, omu stimava à 6,7 millioni u nùmaru di parsoni vìttime d’incestu una volta omancu in a so vita. 69 % di e vìttime anu dinunziatu sse viulenze, ma 67 % anu palisatu chì di parlanne ùn avìa cambiatu nunda à a so situazione, è 74 % dìcenu ch’ellu ùn ci hè statu lagnanza di pettu à a ghjustizia. U silenziu, l’inazzione, l’impunità… sò viulenze anch’elle.
Ci vole à identificà i segni di maltrattanza, rinfurzà a furmazione di i prufessiunali in cuntattu cù i zitelli, infurmà, prevene, mette in rilazione è cuurdunnà i servizii incaricati di a prutezzione di a zitellina, di a medicina, di l’Educazione naziunale, di a pulizza, di a ghjustizia, mette in ballu prutuccoli da chì l’alerte pòssinu esse pigliate à u sèriu… ci vole à agisce. In fùria. •
Fabiana Giovannini.
* Sè vo site vìttime o testimogni di viulenze contr’à un zitellu, chjamate u 119. Hè u nùmaru naziunale di a prevenzione è a prutezzione di i zitelli in perìculu.