Cù a Ciivise, a Criivise in Corsica, cù a « parulla liberata » di tutti sti zitelli una volta diventati maiò, si capisce quantu a sucietà hà fiascatu a so prutezzione di a zitellina in Francia. Hè un stumacheghju tamantu u mondu chì scumoda. Durante troppu tempu sti scàndali sò stati piatti, è i boi prutetti. U fenòmenu sh’è sparsu è e vìttime, sempre più numarose abandunate, sò firmate mute anch’elle di tamante suffrenze. Cumu un ciucciu, un zitellettu, una zitelletta, ponu avè a forza di dinunzià ciò chì li fàcenu i so primi prutettori, i so parenti o l’amminstrazioni pacate per prutègeli in u casu di i zitelli piazzati ? Cume pè e donne marturiate, u travagliu di dinunziazione di ssu martoriu principia. Dapoi qualchi annu, in grazia à associi, libri di vìttime o di testimogni, è ssu travagliu di a Cumissione indipendente nant’à l’incestu è e viulenze sessuale fatte à i zitelli, u velu di a verità si leva pianu pianu…
Sta settimana, un prucessu s’hè apertu nant’à a maltrattenza di i zitelli piazzati in u Nordu di a Francia. 18 personi sò ghjudicate per avè marturiatu, viulentatu, turturatu, custrettu à travaglià, drugatu zitelli accolti ind’è l’Indre, l’Alta Vienne è a Creuse da u 2010 à u 2017. Una ventina di zitelli, maschji è fèmine pàrlanu di calci è pugni, staffilate, strangulazione, tucchichjate, umiliazioni… L’Aiutu suciale à a zitellina (ASE), amministrazione in Francia incaricata di prutègela, l’avìa piazzati ind’è famiglie ch’ùn èranu micca abbilitate à riceve zitelli. Una di sse famiglie era ancu interdetta di riceve zitelli per vìa di cundannazioni per agressione sessuale nant’à minori… Decine di zitelli sò stati dati da l’ASE à una struttura chjamata « Enfance et bien être » (sic) induv’elli sò stati dopu maltrattati. È l’ASE ch’ùn cuntrullava nunda, pacava… 630.000 àuri sò stati dati in 7 anni à quellu associu chì davva i zitelli à sse famiglie contr’à soldi è u drittu di marturiali. « Certi di ssi zitelli sò stati trattati cum’è schiavi, simu stati spaventati amparendu a vastità di ssu cartulare » dice unu di l’avucati di a partita civile.
Ma l’ASE ùn hè micca inchietata ind’è ssu prucessu allora ch’ella hà cundannatu ssi zitelli lavèndusi i mani cum’è Ponce Pilate. « Hè a prima volta ch’un prucessu tocca direttamente l’ASE ma nisun di i so rispunsèvuli ùn hè ghjudicatu, perch’è ? » dumanda l’associu « Innocence en danger » chì dinunzia u scàndalu. « Avemu l’uccasione di crepà un bucciòmbulu tamantu è d’offre una seconda scenza à ssi zitelli ch’anu campatu l’orrore » dice l’associu. « M’hà pisciatu addossu » conta una vìttima. « Ùn vulia micca ch’eu portu panni di sottu… guardava tutti i ghjorni sè no a fecìamu, tucchènduci… » dice una zitella… Un antru torna, hà avutu u capu ciuffatu in cabinettu per punizione… Certi durmìanu ind’è u freddu, senza acqua nè elettricità.
L’affare s’hè sapiuta dopu à un accidente di velò d’un zitellu ch’ùn hà micca vulsutu vultà ind’è a so famiglia d’accolta dopu à l’uspitalisazione. Un inchiesta hè stata aperta da a pulizza… ch’hà truvatu una sessantina di casi simili.
St’affare cum’è tutti l’altri scàndali dinunziatu da a Ciivise, rivela un scàndalu primu, è centrale, quellu di i disfunziunamenti di l’ASE creata per aiutà zitelli in perìculu cacciati à a guardia di i so parenti per vìa di e so mancanze o di e so viulenze. L’ASE hà fattu peghju.
À quandu una vera rifundazione di u funziunamentu di l’ASE in Francia ? •