Enfance & Familles d’Adoption (EFA) hè una federazione di 92 associ dipartimentali chì còprenu 93 dipartimenti in Francia, adunisce quasi 6000 famiglie adduttive, è conta più di 600 benevulenti. EFA agisce dapoi 60 anni è hà seguitatu omancu 200.000 adduzzioni. Appronta i candidati à l’adduzzione, sustene l’adduttanti è l’adduttati, prupone furmazione prufessiunale è dà infurmazioni è cunsiglii nant’à l’adduzzione.
L’associu ùn dipende micca di i puteri pùblichi è ùn dà micca zitelli à l’adduzzione. U so rolu hè d’accumpagnà quelli chì bràmanu d’esse parente è di sustèneli dopu in a so parentalità. Hè dinù di fà sente a voce di i zitelli adduttati è di e so famiglie. EFA hè membru di u Cunsigliu naziunale di l’adduzzione creatu in 2022 da u ministeru incaricatu di a prutezzione di a zitellina.
L’adduzzione in Francia seguita lege rigurose. Un zitellu senza famiglia, o natu in u secretu (vale à dì sous X datu à l’adduzzione da a so mamma) diventa pupilla di u Statu. Hè presu in càrica da i servizii d’aiutu suciale à a zitellina (ASE) sin’à ch’ellu possi esse adduttatu à l’età di trè mesi. Aspettendu, hè messu in ciucciaghja o in famiglia d’accolta da l’ASE chì dipende di u Cunsigliu generale di u dipartimentu cuncernatu. Ind’è noi, ghjè a Cullettività di Corsica chì rege. In tutte e regioni ci hè un Cunsigliu di famiglia è di i pupilli di u Statu (CDFPE) cumpostu d’eletti è d’associi famigliali sott’à a presidenza di u prefettu, chì studièghja e candidature di i parenti è decide à quale u ciucciu serà rimessu. Sè u CDFPE hè una struttura chì dipende di u Statu, ghjè u presidente di u dipartimentu (o di a regione pè a Corsica) chì ziffra l’adduzzione quand’ella hè decisa.
U CDFPE studieghja dinù a situazione di i zitelli cacciati à i so parenti è diventati pupilli di u Statu. In u 1981, EFA hà creatu in u so senu un serviziu Zitelli in ricerca di famiglia (ERF) pè i zitelli ch’ùn sò micca stati adduttati. U scopu hè di pudè travaglià di più cù u CDFPE è e stituzioni in generale à prò di u zitellu.
EFA 2B hè l’associu d’adduzzione in Corsica. Hè u solu associu chì s’occupa di l’adduzzione ind’è noi è i so membri sò furmati appostu. Hè presidatu da Agnès Rogliano Desideri dapoi u 2016, Anton’Battista Palmieri n’hè u tesurieru è Van Flori a secretaria. L’associu hà l’aiutu ghjurìdicu di Celine Boyard, avucata à u Barreau di Parigi è conta frà i so membri Jean-Marie Colombani, grande persunalità fiura di l’adduzzione in Francia. In quasi tutti i dipartimenti, EFA hè raprisentata in a Cumissione d’agrementi chì studieghja i cartulari di i parenti candidati. Ma micca in Corsica. Hè un prublema maiò di discriminazione pè i parenti adduttanti di l’ìsula. L’associu face puru un travaglionu di cunsigliu è d’accumpagnamentu à u latu di i parenti. Dinunzia e maltratanze chì ponu esiste contr’à i zitelli. Cullabureghja cù parechji altri associ è cunduce a so lotta secondu à u principu internaziunale di l’interessu superiore di u zitellu. Brama di pudè travaglià in bon’intelligenza cù i servizii di a Cullettività di Corsica è di u Statu. Un sèriu chì cummanda una ricunniscenza stituziunale più accertata. Sarebbe un mìnimu per l’avvene di ssi zitelli. •
Infurmazioni : [email protected]
Facebook : @efa2b
