À tutti quelli chì sò cascati ssu 5 di maghju 1992, pensendu campà frà e più belle serate di a so vita… à quelli ch’anu chjosu l’ochji empii di stelle turchine… à quelli ch’anu persu e so gambe è ch’anu avutu a so vita strutta… à quelli ch’anu persu un caru… à sti 30 anni… stu magnìficu cantu di Ghjuvan’Francescu Bernardini.
Era un cinque di maghju
Sentu sempre vucià
Si calava u ragiu
Annuttava digià
Era un cinque di maghju
In li nostri campà.
Duve sò spaisate
Quelle voce à cantà
D’altre chì sò vultate
L’anu intese chjamà
Duve saranu andate
E so sciarpe à vulà.
Indu e stelle turchine
O quale hè chì a sà
E campane latine
L’anu viste passà
È tante altre matine
Pienghjenu sempre avà.
Era un cinque di maghju
Chì ùn si vole chjinà
Era un cinque di maghju
Perdunateci Ò Mà… •
