Felì hà principiatu u giru di i so 60 anni ! U nostru amicu nascìa à tempu à Arritti in u 1966, a so voce, u so impegnu tamantu pè a lingua è a cultura corsa, a so simpatìa ne fàcenu un di i cantatori i più tenutu caru di u cantu corsu !
Duie seratone da fila ssu 13 è 14 di ferraghju in un teatru l’Albore carcu à trunchera è un ambiente di festa è d’allegrìa, Felì sta volta ci hà fattu entre in a so intimità, cum’è sè no èramu in casa… « un pocu cum’è sè no fighjàvamu inseme una fottò » hà spiecatu u cantatore.
A formula uriginale è calurosa hè piaciuta assai, u decoru cù futtogli, tavulini è candelle… ci hà cuntatu « Felì », i so principii, a famiglia, l’amichi, a musa cum’ella li hè ghjunta, a stòria di e puesìe è di e cumpusizione… Sussurendu quasi i canti, di a so vucione ammaestrata, parìa ch’ellu s’indirizzava à ognunu, à l’arrechja, capu à capu… à l’ìntimu. Eppò à longu à a serata, è à i successi chè no cunniscimu tutti, tant’elli ci anu accumpagnatu durante tutte st’annate, a so mùsica hà ribumbatu è a sala s’hè animata di più in più cù sciaccamanate è frischji di gioia. L’ambiente hè diventatu un pocu più ritimatu è u pùblicu presu in ssu cumbugliu hà partecipatu crescendò anch’ellu. È cusì, Felì ci hà fattu cantà una volta è pò duie è pò trè… à longu à una bella serata d’amicizia è di spartera !
Da ssu 1989 sin’à oghje, Felì ci hà rigalatu una dodecina d’albomi è più di 150 canzone cumposte cù Ghjuvan’Tèrramu Rocchi, ma dinù Ghjàcumu Fusina o Patrizia Gattaceca… Scambii cù d’altri munumenti di a nostra cultura, Antone Ciosi, A Filetta, Canta u Pòpulu Corsu, Petru Guelfucci, è tant’altri… Serate è seratone rigalate, eppò ben intesa ssa magnìfica operata pè a nostra lingua è a nostra cultura ch’ellu hà custruitu cù Scola in Festa ! Tante generazioni ci anu betu à a so surgente !
In giru à ellu stu 13 è 14 di ferraghju, l’amichi Alain Gherardi à a bassa, Pierre Agostinetti à u pianò, Michael Olivier à e percussioni, Toni Fallone à l’urganetti, Laura De Giovanni à u cantu, una voce feminile magnìfica chì s’accorge cusì bè cù quella di Felì… è chì sparte avà a scena incù ellu. Una bella stòria ind’è a stòria !
Altri sustegni impurtanti per appruntà sti cuncerti, Santu Limongi, Blaise Dispenseri, i tècnichi di u teatru l’Albore, a cità di Bastia…
Felì hà da girà in Cuntinente è in Corsica tutta l’annata è hà annunciatu compie in una capitale aurupea ssu sguardu nant’à i so 60 è qualchi 50 anni di cantu. È vole purtacci tutti. Ne riveneremu à parlà. •
• Leghje dinù :
