Sveglià e cuscenze, mubilizà l’attori capaci di rompe sta calamità di e viulenze di coppii, frà u più, e viulenze contr’à e donne, eccu u scopu di ssu Grenelle apertu sta simana da Marlena Sciappa ! Ghjè bè. Ma palesa un fiascu tremendu.
Cumu addimette u bisognu di st’iniziativa allora chè no campemu u XXIu sèculu dopu à Cristu ?
Cumu accettà chì a nostra sucetà, frà e più sviluppate di a pianetta, possi cuntà 101 morte di donne dapoi u principiu di l’annu, 121 in u 2018, 130 in u 2017 ? Cumu accunsente ssu bilanciu tremendu d’una donna chì more tutti i dui o trè ghjorni ? U Grenelle di e viulenze fatte à e donne ghjè nanzu tuttu un custatu d’imputenza, una presa di cuscenza troppu tardiva per tutte sse donne ch’aspettàvanu una manu tesa ch’ùn hè mai ghjunta per falle esce di l’infernu. L’omi dinù sò vìttime, ma u più sò donne, è zitelli, à more sott’à i colpi di un sposu o di un cumpagnu. Aldilà di e viulenze fìsiche, ci hè a scaduta murale. A donna hè sola di pettu à l’inghjulie è l’offese cutidiane, l’avvilimentu, a pèrdita di dignità, u cuntrollu di a pensata, a spiccanza di i soi, parenti, amichi, vicini, travagliu… Impriggiunata in a so suffrenza, a donna perde a stima di sè stessa, culpabilizeghja, è si trova incarcerata da u so boia, incapace di dalli di pettu. È quand’ella chjama à u succorsu, a sucetà ùn sente micca. Pulizzeri chì si n’impìppanu, à le volte chì si ne rìdenu, assistanti suciali pocu primurosi, o sopracarchi di travagliu, famiglia o vicini chì si ne stanu zitti, da a paura, a vergogna, o l’indiferenza… ùn vale à mette à colpa à l’uni o l’altri, u fiascu hè di tutti. A sucetà sana hè culpèvule, è a sucetà sana chjode l’ochji. Sò e nostre mentalità ch’ellu ci tocca à rifurmà. U prò di ssu Grenelle, hè di parlà di u fenòmenu, di fallu esce da ciò ch’ùn si dice, di spàrghjelu in i mèdia. Frà i conturesi di i ghjurnalisti, ci hè sta videò d’un inchiesta ind’è l’annate 70, ch’interrugava l’omi in carrughju nant’à ciò ch’elli pènsanu di e viulenze fatte à e donne… e risposte sò tremende. «Oooh, anu l’abitùtine, ci n’hè chì li piace à esse battute»… «è s’eo vi dicu chì mengu a mo moglia da ch’ella sìa più brava cù mè è più innamurata di mè ? »… « quandu u dialogu ùn hè più pussìbule, à certe donne ci vole à fali entre in capu à pugni »… « certe ghjùnghjenu a mane un pocu più marcate chì d’abitùtine, sicuramente per vìa d’un accidente di casa, si sò intuppate cù una cazzarola, hè pussìbule »… «oooh, pìcculi schjaffi… ùn sò nunda… ghjè ciò ch’ellu ci vole aspettà di i rapporti umani nò ? »…
Un mezu sèculu dopu, mòrenu sempre e donne sott’à calci è pugni.
Fabiana Giovannini.
