U pòpulu ucrainianu ùn hà piegatu. Quatru annu di guerra, di bombe, di morti, di torture, di viulenza, di destruzzioni, è ùn hà piegatu. Di pettu à a seconda più putenta armata di u mondu, di pettu à un pòpulu 4 volte di più numarosu, di pettu à un dittatore furbu, ùn hà piegatu. Notte dopu à notte à fallà à piattassi in u metrò. Ghjornu dopu à ghjornu à ricustruisce ciò ch’era struttu à a vigilia, pullisce, rimette in òrdine, uspedali, scole, usine, magazini, strade… pruvà à travaglià listessu, malgratu a guerra, tene arrittu u paese, cuntinuà à fà scola à i zitelli, occupassi di u cutidianu, stà ancu à sente a mùsica, ballà, andà à u teatru… campà. Firmà degnu è lìberu. Allora Poutine è a so armata s’inzèrganu. U vòlenu fà piegà stu pòpulu curagiosu. Strùghjenu sistematicamente tutte e stallazioni energètiche d’Ucràinia. Da taglià l’elettricità, u gas, lasciali senza lume, senza di chè pudè scaldassi, u scopu hè di faticà sta resistenza, falla piegà. Cutrala à timperature streme, sin’à menu 20 o 25 gradi… « face di più freddu ind’è l’appartamentu chè ind’è u rifritoghju » palesa una donna, i ghjacci appesi à e finestre, duie o trè strati di vestiti addossu è camuffata sott’à duie o trè cuperte… Omu si cotra in casa, senza pudè fà a cucina, senza lavassi, o pudè lavà i panni, senza mancu pudè dorme. Sò cusì cinnini, donne, vechji, giòvani stanchi di freddu… piegheranu ? Sò millioni à campà sott’à timperature pulare. Face più d’un mese ch’ella duri. È cù u fredu, crèscenu l’attacche rùssie chì si ghjòvenu di a meteò per affannà a ghjente.
Ma resìstenu torna l’Ucrainiani. Urganizèghjanu sottu tendoni distribuzioni di suppa calda, tè o cafè, vènenu quì à passà un ora o dui, per arripusassi una crìa, carcà u so telefuninu, fassi una chjachjarata, ride. Resiste.
Più di 2000 chilòmetri più inghjò, face un pocu menu freddu in Gazà… ma sò timperature ghjacciate dinù.
A notte, càscanu sin’à 8 gradi… cù acqua è ventu chì vènenu à impeghjurisce a situazione di a ghjente aggruttata sottu à tende di furtuna, fatte di stracci o plàstichi mezu strappati induv’ellu piove cum’è fora. Senza tetti, senza di chè scaldassi, in u freddu è l’addisperu è i pedi ind’è l’acqua cù l’inundazioni… Anu persu tuttu, case è famiglie à le volte, parenti o figlioli, è càmpanu di limòsina appressu à l’associ umanitarii. Vechji è cinnini, più dèbbuli, mòrenu di freddu. È ogni tantu torna mòrenu sott’à bombe israeliane malgratu a trègua. 132 attacche dapoi dicembre anu fattu decine di morti è feriti. Ma sò quì, ùn vòlenu parte, sò Palestiniani è pròvanu à campà in Palestina. Quì dinù si trova tendoni urganizati per manghjà qualcosa di caldu, arripusassi un pocu. Fà ghjucà i zitelli. Curassi. Resiste inseme. 18.000 personi malati, frà i quali 4.000 zitelli, dice l’ONU, aspèttanu di pudè esse trasferiti fora di Gazà ver di a Cisgiordanìa per esse curati, ch’in Gazà, ùn ci hè più nunda. Solu u freddu è a misèria.
Stu freddu diventatu un arma di guerra in Ucràinia cum’è in Gazà. •
>>> Leghje dinù
