Trump ghjoca e vintarole, Poutine scaccaneghja ind’è a so barba è sbuciarda à più pudè, Netanyahou ùn vole sente nunda, freddu è disprezzante da ghjaccià u sangue…. i so suldati beati cum’è pichji si pìglianu in fottò di fronte à i casali chì si sfòndanu in un nùvulu di fumaccia… e bombe fàlanu nant’à l’Ucràinia è nant’à Gasà… Mòrenu zitelli, donne, omi sott’à sse bombe cecche è assassine… In u frà tempu, sòffrenu d’angosce, di sulitùtine, di maltrattenza, l’ostagi ghjudei è e so famiglie… Duve seranu ? Quantu seranu torna in vita ? Face 18 mesi ch’elli sò stati arrubati à i soi è purtati vìa per ghjove di riscattu. Dapoi, strazièghjanu ind’è l’infernu di sse guerre suldati è civili nucenti. D’altri sò struppiati à vita, pèrdenu e so case schiattate in u fracassu di i missili rùssii, è ùn anu più tetti in u freddu di l’inguernu ucrainianu, o in e ruine di a Palestina martirizata. Cù ella piènghjenu i sonnii è e famiglie di tutta sta corcia ghjente famita, assitata, stralunata, errendu trà mezu calcinacci è pòlvera… Trà morti è feriti, si còntanu un millione è mezu di vìttime in Ucràinia, più di 160.000 in Palestina. È i putenti, elli, s’amùsanu di a vita umana, sparghjendu l’odiu landanu. Peghju, fabrichèghjanu l’odiu di dumane chì stirperà ancu di più vite. Si vede ind’è l’ochji di ssi cinnici. Ghjunti maiò, ùn finisceranu di sunnià vindetta. Trump si n’impippa, è ziffra decreti à più pudè, fendu dui passi di ballu sgargalati, i pugni strinti, è un ammosciu nant’à e lapre, capu altu, cum’un zitellu capriziosu… Hà piantatu a sola guerra chì vale, quella contr’à u riscaldimentu climàticu, rimettendu in càusa l’ingagiamenti di reduzione di gaz à effettu di serra. Rinvìa in casa centinaie di funziunarii è di scientìfichi chì s’impegnàvanu dapoi anni è anni in a ricerca pè a pianetta, pè a salute, pè a natura, pè u sviluppu… Manda à caternu i dritti suciali, sputa nant’à i paesi pòveri ch’aspèttanu l’aiutu umanitariu per campà, i stessi paesi à i quali arruba e ricchezze miniere, si rinchjode nant’à a so ecunumìa in un mondu mundializatu ch’ùn prutege più à nimu, è chì quand’ellu mena, volta in fùria u boomerang ! È canta à chì u vole sente « Make America great again ! », allora chì i primi ch’anu da liccà sò l’Americani i più dèbbuli è sca-ghjuli cù l’aumentu di i prezzi… Poutine ellu, cumbriculeghja, impegna à u so latu tutte e dittature, dice di sì, face di nò, affoca u so pòpulu, u sbaglia cuntrullendu i mèdia, tomba l’uppunenti senza pietà. Netanyahou ùn hà più nunda à perde, sà u so salutu ind’è a sparizione di u Hamas, ma l’acqua corre, u sangue stringhje, ùn ghjunghjeranu à stirpalu, troppu aiutatu ch’ellu hè da i paesi à l’ingiru. Custì torna, s’intratene l’odiu è l’agrore chì feranu schizzà di più u sangue dumane è nasceranu torna cunflitti.
Tuttu hè raportu di forza, tuttu cunduce à circà à scrasà per ùn esse scrasatu, cummàndanu solu u soldu, u disprezzu è u sangue sparsu, allora chì l’omu hè capace di tante maraviglie s’ellu s’impegna ind’è a sulidarità è u fraiutu ! Cum’avemu da sorte di tutti sti parapigli è tene ? Quand’elle anu da finisce ste guerre ? Cumu ritruvà sumerinu da fà piantà l’arme ?
È in u frà tempu, d’altri cunflitti sanguinosi sò scurdati è spàrghjenu suffrenze è làcrime, in u Sudanu, à u Myamar, u Congò, in Haitì, in Sirìa…. Pòveru mondu… •
