I Restò di u Core sò nati in u 1985 da l’iniziativa di Coluche smaritu un annu dopu. Oghje sò decine di millaie di benevulenti chì s’impègnanu dapertuttu in Francia per luttà contr’à a puvertà è e sclusioni, uffrendu micca solu ripasti, ma dinù accessu à l’alloghju, a furmazioni, à a cultura, à u drittu, à cunsiglii è cure da tutte e mamme.
Annu scorsu, 171 millioni di ripasti sò stati distribuiti contr’à 142 millioni l’annu nanzu. Vale à dì u bisognu sempre in crèscita ! In Francia 9 millioni di personi sò in situazione di sclusione suciale. I Restò di u Core sò a prima struttura di distribuzione d’aiutu alimentariu in Francia cù 73.000 benevulenti, 2333 lochi d’accolta è 1,3 millione di benefiziarii in 2023, frà i quali 126.000 zitelli.
Fèrmanu più chè mai indispensèvuli.
In Corsica, i Restò di u Core sò stati creati in 1992. U primu centru di distribuzione apre in 1993 in Bastia. Pò apre Moriani in u 1997, Ghisunaccia in 2001, Corti è Aiacciu in 2004, Calvi in 2010, Luri in 2017… Oghje, sò 160 benevulenti in Pumonte, 1927 personi accolte, 364.117 ripasti distribuiti. In Cismonte, sò 141 benevulenti, 2233 personi accolte, 295.644 ripasti distribuiti. È ind’è noi cum’è in Cuntinente, i benefiziarii sò in crèscita, circa 16 % in 2023, contr’à 3 à 5 % l’antri anni.
In più di i ripasti, i nostri Restò di u Core prupònenu attelli di sustegnu sculare, attelli di lettura, sinemà, vìsite è scuperta di lochi di u patrimoniu, pussibilità di parte in vacanza. Ci hè dinù mumenti à sè chì sò pruposti in grazia à stonde di pillucchera o curamenti à l’Istitutu Bellezza Sulidaria in Bastia.
Ancu assai chì i Restò ponu cuntà nant’à u sustegnu di certe imprese corse, eppò di a ghjente. Tutti l’anni i benevulenti urganizèghjanu campagne di racolte. In 2021, 12 tunnellate di prudutti alimentàrii sò stati racolti in u Pumonte, 15 tunnellate in 2022, 20 tunnellate in 2023… In Cismonte sò più di 18 tunnellate di prudutti racolti in 2023 contr’à 11 in 2022. Paste, zùccheru, farina, ogliu, biscotti da tutte e mamme, ma dinù prudutti sanitarii, prudutti pè i ciucci… « ancu assai chì a ghjente hè generosa, ci aiùtanu, puru a situazione hè cumplicata per tutti » ramenta a presidente di i Restò cismuntinchi, Françoise Colomb Luciani. In Pumonte, l’associu hè presidatu da Isabelle Torre.
In più ci sò duie campagne avà. A campagna d’inguernu è quella d’estate. Face ch’elli sò aperti tutta l’annata i Restò. È bisognu ci hè ! Ste campagne permèttenu di cumplettà l’aiutu chì vene da u Cuntinente.
Giòvani, personi anziane, mamme sole, migranti… 84 % di i benefiziarii anu menu di 50 anni. Più di 30 % anu difficultà d’alloghju. Più di a metà campa sott’à u livellu di puvertà…
I prublemi di i Restò in Corsica sò quelli di tutti l’associ : a calata di i benevulenti è a crèscita di i benefiziarii chì face ch’elli sò custrinti à le volte di sminuisce l’aiutu à e famiglie, vale à dì sminuisce u nùmaru di ripasti offerti à a settimana… •
Infurmazione Cismonte : [email protected]
Infurmazione Pumonte : [email protected]
