1 annu chì u ghjurnalista spurtivu Christophe Gleizes hè imprigiunatu in Algeria, ritenutu di manera abusiva per avè vulsutu fà u so mistieru di giurnalista. Arrestatu di maghju 2024, piazzatu sott’à cuntrollu ghjudiziariu, hè incarceratu dapoi u 29 di ghjugnu 2025. Hè statu cundannatu à 7 anni di prigiò per « apologia di u terrorìsimu ». U putere algerianu li rimprova cuntatti cù autunumisti amazirghi… scuntrendu i rispunsèvuli di u club di futbolu u più impurtante di Cabilia, Jeunesse Sportive de Kabylie. A ripressione contr’à i berberi mena in Algeria. Per Christophe, si spera una gràzia presidenziale… Di manera simbòlica, per marcà u so sustegnu, a FIFA l’hà accreditatu pè a cuppa di mondu di futbolu. Vulia solu cuntà una stòria di pallò… Libertà per Christophe Gleizes !
1 mese chì a populazione albanese manifesteghja contr’à un prugettu immubiliare purtatu da a famiglia Trump (a so figliola è u so ghjènneru) nant’à un spàziu naturale sensìbule. Dapoi à fin’di maghju è a ponitura di fili spinati, ogni ghjornu ci hè una manifestazione, sin’à sfilà à decine di millaie in a capitale Tirana. Certi osservatori pàrlanu di più di 100.000 manifestanti è e fottò nant’à i retali sò impressiunante. Dumàndanu a demissione di u guvernu incapace di priservà a terra è a so biodiversità magnìfica. Aspettendu a ripressione mena. Un centu omancu di manifestanti sò stati messi in esame per blucchime di a circulazione, disturbu à l’òrdine pùblicu, partecipazione à manifestazioni illegale… « Simu quì per fà sente a nostra voce contr’à stu prugettu ma dinù contr’à a lege attuale chì apre a custruzzione nant’à zone prutette » dìcenu i manifestanti…
U prugettu prevede decine di villa di lussu è cumplessi osteriaghji per più di 4 milliardi di dòllari… Sustegnu à u pòpulu albanese chì prova à prutege a so terra è u so ambiente !
7,5 di magnitùdine, i dui terramoti successivi à u Venezuela anu già fattu più di 1.400 morti, 3200 feriti, è più di 50.000 spariti… 7 millioni di personi sò stati tocchi da ssa catastrofa, frà i quali 2 millioni in a capitale Caracas. U bilanciu hè tremendu. I disguasti sò stati evaluati à più di 6,7 milliardi di dòllari.
1.000 anni di stòria… a catetrala ortodossa di a Dormition in Kyiv hè un munumentu stòricu micca solu per l’ucrainiani ma per tutti l’ortodossi di u mondu. Custruita à l’ondecèsimu sèculu hè cunsiderata cum’è u primu mudellu di e grande ghjesgie munàstiche di a Rus’di Kyiv, un statu medievale ch’hà fundatu l’identità ucrainiana. I tetti è a facciata sò stati strutti da un incèndiu dopu à un’attacca rùssia.
9 ore di neguziati senza arrestu… a riunione trà Scola Corsa, a Cullettività di Corsica è i prefetti di Cismonte è Pumonte s’hè compia nant’à un protocolu d’accordu chì securizeghja u piannu di finanziamentu di a Cullettività di Corsica à u prufittu di Scola Corsa, l’ingaggiamenti effettivi di u Statu pè i sei posti cuntrattualizati prumessi, è l’ingaggiamentu dinù di truvà una suluzione finanziaria sè sti dui puntelli ùn bàstanu micca.
A rientrata 2026-2027 hè salvata, ma a lotta pè a cuntrattualisazione generalizata cuntinueghja. •
