65.000 personi càmpanu in Corsica sott’à u sogliu di puvertà. A Corsica ferma a regione à più pòvera di Francia, è u peghju ghjè chì malgratu l’azzione per frinala, invece di calà, sta precarità ùn face chè crese. 18,3 % di a pupulazione campa cù menu di 1.100 àuri à u mese, contre 14,4 % in Francia. È a metà di ssa ghjente campa cù menu di 890 àuri à u mese, dice l’Insee.
28. Sò l’anni passati dapoi l’assassìniu di u prefettu Erignac u 6 di ferraghju di u 1998. Oltre u drama umanu, un sbagliu pulìticu tamantu pagatu caru da u pòpulu corsu durante anni è anni, seguitatu da u scèmpiu di l’affare Bonnet, po a ripressione di a famosa pista agrìcula è l’accusu di pòpulu prefeticidiu, pò l’inchiesta ch’hà cundutta à l’arrestazione di u commandò, po a strage di l’affare Colonna… tamante suffrenze… è fèrmanu sempre interrugazioni senza risposta.
55.000 suldati morti. Decine di millaie di feriti. È mondu spariti… hè u prezzu di a guerra in Ucràinia, palisatu, à làcrima à l’ochju, da Volodymyr Zelenszy di fronte à una ghjurnalista di France 2. Senza parlà di i morti è di i feriti civili… Sò quatr’anni di guerra, è un bilanciu finale chì serà bellu di più tremendu.
U Centru di i stùdii stratègichi è internaziunali (CSIS), ONG internaziunale, evalueghju ellu à sicuramente trà 100.000 à 140.000 i suldati ucrainiani tumbati dapoi ssu maladettu 24 di ferraghju 2022 è l’invasione imperialista rùssia in Ucràinia.
4.849. Hè u nùmaru di i cristiani tumbati in u mondu secondu l’ONG « Portes Ouvertes » in 2025. Frà i quali 3490 à u Nigeria. 3632 ghjesgie sò state attaccate, frà e quale più di 1000 in China, 1000 torna à u Nigeria. 4712 cristiani sò stati imprigiunati per vìa di a so religione, frà i quali 2192 in Ìndia.
Sò 388 millioni i cristiani minacciati di persecuzione in 78 paesi di u mondu per vìa di a so fede dice torna l’ONG. Deci anni fà, èranu 215 millioni in 60 paesi sfarenti.
Portes Ouvertes hè un associu fundatu in u 1955, à l’iniziu per sustene i cristiani persecutati in Unione Soviètica. U so Atlas mundiale 2026 di a persecuzione contr’à i cristiani hè limitatu à i 50 paesi induv’elli sò i più persecutati, è si face in gràzia à inchieste soprapiazza è più di 5000 testimogni.
Secondu un raportu di u ministeru di l’Affari stranieri inglese in 2019, 80 % di i credenti persecutati in u mondu sò cristiani. •
• Leghje dinù
