U Socios Étoile Club Bastia (SECB, u sìgulu stòricu di u Sporting) hè un muvimentu pupulare uriginale creatu da sustenitori bastiacci per salvà u Sporting di a sparizione. Hè di più ch’un associu di sustenitori, hà per scopu a difesa di l’interessi di u « pòpulu turchinu » è di u Sporting Club di Bastia.
In 2017, u Sporting hè l’ùltimu di a classìfica di Lega 1. A falata in Lega 2 si trasforma in un fragellu tremendu cù sanzioni sprupurziunate per vìa d’incidenti accaduti contr’à Lyon in Furiani, è per vìa di a situazione finanziaria catastròfica di u club (20 millioni di dèbbite). Bastia falla di 5 divisioni è si ritrova frà l’amatori. U club ùn hà più soldi, a maiò parte di i ghjucatori è di u staff u chìtanu. Uni pochi di sustenitori ùn vòlenu vèdelu sparisce è fàcenu una chjama à cuntribuzione. Hè cusì ch’elli sò nati i Socios. À tempu, una nova squadra dirigente s’impegna per salvà ssu club stòricu diventatu in un sèculu una vera stituzione, è a ricullata hè strasurdinaria in pochi anni.
« Bramemu di mette in ballu e cundizioni necessarie per fà chì sta situazione spurtiva, ecunòmica è suciale ùn vene più spaventà u nostru club » dìcenu i Socios. « Cù a ripresa di u club un antr’èpica s’apre, induve tutti i Socios seranu parte sana da chì u nostru club diventi un esempiu pè u ghjocu à pallò pupulare in u XXIu sèculu ».
I Socios còntanu oghje 5470 membri. U so scopu hè « d’esse un partenariu in a gestione di u club, à tempu ch’un interlocutore privilegiatu pè i dirigenti è una guaranzìa di u mantenimentu di i so valori ». L’associu hè presidatu da Ghjuvan’Francescu Coquery ma sò una decina à impegnassi di manera cutidiana è à intervene nant’à i prugetti di u club. A so forza ferma i so aderenti cunsultati sistematicamente à tutte l’uccasioni. A vuluntà hè di mette in ballu « una struttura a più demucràtica è a più muderna pussìbule induve i Socios averanu a pussibilità di vutà pè i grandi prugetti messi in ballu ».
Cusì, u SECB intervene assai in a vita di u Sporting. Da u stàdiu Armand Cesari à tutte l’infrastrutture di u club sin’à u centru di furmazione o l’Accadèmia di u Sporting. Mette manu in stacca, reagisce à l’attualità è difende i sustenitori, per vìa di l’amende cunsiderate inghjuste, è si prova à ragiunali. A pirutecnìa per un dettu, hè interdetta in Francia ma permessa indi fora, cum’è in Italia. U SECB intervene dinù in a scelta di e magliette, l’urganisazione di i scontri, l’affreschi di u stadiu, eccèttera. Partecipeghja à i spiazzamenti di sustenitori è face campagna per l’abbunamenti. È, ben intesa, hè membru attivu di u Cunsigliu d’amministrazione di a cuuperativa di u club.
« U Sporting face propiu parte di a nostra vita. Ghjè un patrimoniu inalienevule chì appartene à tutti, à ogni Corsu. Tandu, noi altri passiunati, ùn avemu u dirittu di rinuncià è di lacà quell’istituzione nata in 1905 andassine di male ».
I Socios sò una vera dimarchja citatina in rispunsabilisazione, è un uriginalità in Francia. •
Infurmazione è cuntattu : www.sociosbastia.corsica
