Le Garde hè unu di i più vechji associ di difesa di l’ambiente corsi. S’ellu ùn hè u più vechju. Hè statu creatu in u 1973 in Aiacciu ma scumbatte nant’à tutti i terreni di a lotta per l’ambiente. È ci hè di chè fà !
Le Garde hè à l’imàgine di a so presidente è purtavoce, Muriel Secondy, è a so azzione, dice u so situ, « porta l’impegnu pùblicu di citatini corsi à favore di a difesa di l’ambiente. Hè un associu assai attaccatu à e rilazioni curtese, rispettose è custruttive cù tutti i servizii ch’elli sìanu di u Statu o raprisentendu eletti ».
Le Garde hè membre di parechji urganìsimi induv’ellu prova à fassi sente : Cunsigliu ecunòmicu suciale, culturale et ambientale di Corsica (CESEC), Cunsigliu dipartimentale di l’ambiente è i rìsichi sanitarii è tecnulògichi di Corsica Suttana, Qualitair Corse. Partecipeghja dinù à u travagliu d’elaburazione di i piani di prutezzione di l’atmosferu, di u Docob Natura 2000 in mare, in u golfu d’Aiacciu, di u pianu di gestione di i rìsichi maiò di a Cumunità d’agglumerazione di u paese aiaccinu, di i piani di prevenzione di rìsicu d’inundazione in Aiacciu. S’impegna pè a qualità di l’aria, di l’acqua, di l’ambiente in generale, di a difesa di a biodiversità, di e règule d’urbanìsimu. Scumbatte contr’à tutte e pulluzioni, in i settori di i lozzi, di l’energìa, di i trasporti marìttimi, di u turìsimu. Porta a so azzione sin’à u Tribunale s’ellu ci hè bisognu. Per un dettu, dice torna u so situ, « hè un azzione di Le Garde ch’hà permessu di salvà l’hélix ceratina à u Ricantu », una spècia di lumaca endèmica di Corsica cù a so prutezzione da u Cunservatoriu di u Liturale.
Hè torna un azzione di Le Garde ch’hè stata cundutta « contr’à un prugettu di custruzzione di 14 villas à u Capitellu in Purtichju ». Un bellu successu purtatu sin’à a Corte Amministrativa di Marseglia u 24 di maghju 2017. U prugettu si vulìa rializà nant’à un spaziu rimarchèvule, una Zona d’interessu eculògicu, funesticu è floristicu di prima trinca (Znieff 1) cù a presenza di vispaghji è orchidee prutette.
Le Garde s’impegna suvente in sulidarità cù d’altri associ di difesa di l’ambiente, pè u più U Levante, cum’è pocu fà contr’à u prugettu in Saparella chì li costa d’esse imbruttitu da una campagna bugiarda è indegna nant’à i retali suciali.
Hè membre di a Cuurdinazione Corsica Pulita chì scumbatte contr’à u pianu di trattamentu di i lozzi in Corsica. Sustene Tavignanu Vivu contr’à u prugettu di Ghjuncaghju. Scumbatte contr’à a pulluzione di i battelli di crucere.
I so membri sò tutti benevulenti è li costa in soldu, tempu è tranquillità u so impegnu. L’associu ùn tocca suvvenzioni è campa di u solu sustegnu militente. Si definisce cum’è « un associu eticu », rispettosu di e règule, è rettu da una « direzzione cullegiale ». •
