A quarta edizione di a Currilingua si tene da Sartè à Cavru u 28 di sittembre 2024. Sò aperte e scrizzioni.
Cunniscite avà i cundizioni. Si corre nant’à 67 chilòmetri. Cumprite unu o parechji chilòmetri (100 auri u chilòmetru) è vi rendite nant’à u puntu indicatu per ripiglià u testimognu è purtalu à d’altre personi chì l’aspèttanu u chilòmetru più luntanu.
Tutti ponu scrìvesi : particulari, scole, imprese, cumerci, associ, club spurtivi, amministrazioni, eletti, ecc. Basta à pacà u vostru chilòmetru. I soldi raccolti ghjuveranu dopu à aiutà prugetti per sustene a lingua corsa.
È ùn v’inchietate sè vo ùn site tantu spurtivu : « ùn si corri micca par vincia, hè una corsa cù un tistimoniu à trasmetta, cù chilòmitri à cumprà » spieca u presidente di Parlemu Corsu, Micheli Leccia, « hè una corsa chì si voli fistiva, chì voli impignà u più pussìbuli d’aienti è chjamata à crescia d’un annu à l’altru ».
Aiò, forzà ! Currite pè a nostra lingua è sustenite st’òpera magnìfica lampata da u cullettivu Parlemu Corsu ! •