U prima d’uttrovi di u 2023, u cullettivu Parlemu Corsu urganiseghja pè a terza volta a so corsa annuale, sta volta trà Bonifaziu è Sartè. L’ultima edizione di a corsa ha raccoltu guasi 500 personi è più di 21.300 èuri sò stati distribuiti à prò di prugetti in lingua corsa.
U scopu di ss’iniziativa hè di « cuntribuì à l’ilaburazioni prugrissiva, in Còrsica, d’una sucità bislingua » spieca Micheli Leccia di u cullettivu Parlemu Corsu. Hè per quessa ch’ellu « accodda solda cù l’ugittivu di finanzà prugetta maiori à favori di l’usu di u corsu ».
U cullettivu scumparte dopu ssi soldi trà sfarenti prugetti ch’ellu hà selezziunatu.Parlemu Corsu adunisce 800 membra, frà i quali 618 parsoni, 115 associa è 112 gruppa culturali o artisti. Hè un associu assai attivu nant’à u terrenu.
Un pèriodu impurtantìssimu pè a lingua corsa
A Currilingua hè un sìmbulu di un pèriodu impurtante per a lingua corsa.
A nostra lingua ùn hè mai stata cusì tantu in cori à e preoccupazioni di i Corsi è di a classa pulìtica. Incù iniziative chì sò rimesse à u ghjornu, cum’è Scola Corsa dapoi u 2021. Ne avemu parlatu assai in parechji nùmari d’Arritti : incù trè classe aperte è un’aspittera di cuntrattualisazione di u Statu francese, parechji zitelli ricèvenu oghje un insignamentu immersivu in lingua corsa è si còntanu digià i prugressi.
L’evenimentu di a censura di u rigulamentu di l’Assemblea di Corsica da u tribunale di Bastia, à a dumanda di u prefettu, annantu à l’usu di a lingua in l’emiciculu, ramenta à chì puntu scumbatte pè a lingua corsa hè necessariu. È quantu tuttu ciò ch’hè statu custruitu hè fragile è deve esse sustenutu. I locutori in lingua corsa sò oghje più chè mai mubilizati pè a salvezza di a lingua è di u so patrimoniu.
U cullittivu Parlemu Corsu lampa una chjama pè e scrizzioni à a Currilingua 2023 : sèmplice citatini, scole, associ, gruppi culturali, squadre spurtive, imprese, sindicati, cumerci o ancu gruppu d’amichi… scrivìtevi ! Più saremu numarosi è più si sparghjerà a lingua corsa !
Cumu participà à a corsa ?
Vi tocca à riservà unu o parechji chilòmetri, dirittamente annantu à u situ di u cullettivu Parlemu Corsu. U prima d’uttrovi, l’incontru si farà in Bonifaziu à 10 ore di mane, à u Turiun pè a partenza, è pò, currete !
A corsa annuale hè nanzi tuttu un sìmbulu forte pè a lingua corsa. Cum’è u cullettivu Parlemu Corsu a spiega, ùn si tratta micca di una cumpetizione mà di una corsa incù un tistimoniu à trasmette : « Hè una corsa chì si voli fistiva, chì voli impignà u più pussìbuli d’aienti è chjamata à crescia d’un annu à l’altru ! Tutti i chilòmitri una parsona diffarenti devi trasmetta u tistimoniu » spieca torna Micheli Leccia.
Da sapè chì, cum’è tutti l’anni, ritruverete una squadra d’Arritti à a partenza di a corsa u prima d’uttrovi ! È sè vo vulete rinfurzà a nostra squadra, site invitati à raghjùnghjeci ! (mandàteci un messagiu nant’à u nostru Messenger o u nostru situ).
Vinite à sustèneci è à incuragisce i curridori ! Aiò ! Currimu pè a nostra lingua ! •
Lea Ferrandi.
Per scrivesi à a Currilingua : https://parlemucorsu.corsica