Frà l’ùltime dumande di Papa Francescu, ci hè quella di mandà una delegazione di Veschi in Terra Santa. Frà e numarose decisioni ch’ellu hà presu à longu à u so pontificatu, hà ricunnisciutu u Statu palestinianu à u principiu di u so ministeru, in 2015. Dumènica di Pasqua, avìa torna dinunziatu « a situazione umanitaria dramàtica è ignòbile » in Gazà. Ùn era puru indiferente à a suffranza ghjudea è à a situazione di l’ustagi, cundannendu à tempu « u clima d’anti-semitìsimu criscente », è à parechje volte i massacri di u 7 d’ottobre. Di sicuru, ùn ci hè statu Papa, è forse ùn ci hè statu omu, più bramosu di pace ind’è stu mondu, è particularmente in Terra Santa. Ùn s’hè mai stancatu di fà passà i messagi à tutti i prutagunisti di e guerre in u mondu. Hè statu un intervenente attivu ind’è a crisa trà Cubà è i Stati Uniti in 2014. Hè un fattu forte di u so pontificatu : hè statu fidu à tempu à Cristu è dunque à e prese di pusizione di a ghjesgia, tuttu essendu un Papa mudernu, rifurmatore è ancu rivuluziunàriu, un pastore di pace. À l’ùltima omelìa di sta dumènica di Pasqua, ramentava torna Papa Francescu : « Cristu Vivu ùn hè micca un eroe di u passatu ». Ùn ci hè bisognu d’esse credente per capisce quì a chjama ch’ellu hà lampatu à tutti, atei o cridenti, è quale sìanu e religioni. Ùn ci hè bisognu d’esse cristianu o nò, praticante o nò, per mette a pace è l’amore in core di e nostre vite. Forse hè per quessa chì ssu Papa era tenutu caru. A ghjente, è pè u più i giòvani sò in cerca di sensu ind’è stu mondu di cumbugliu è di gattivezze. Cù ssa chjama per rivene à Cristu, Papa Francescu nanzu di more ci hà datu un ùltimu insignamentu chì face di Cristu, valori cuntempurànei, oghjinchi. Dumanda à tutti d’ùn ridùcela à « una bella stòria da cuntà »… « d’ùn fanne micca un eroe di u passatu o di pensà à ellu cum’una stàtua messa in un museu », ma di campà a so parula in vera : « circalu ind’è e nostre vite, in u visu di i nostri fratelli, in u cutidianu, circalu dapertuttu fora di a tomba » hà dettu Papa Francescu. « Fora di a tomba »… pensava forse a so fine vicina. Hà resu u so ùltimu soffiu qualchi ora dopu à stu bellìssimu messagiu. Aghjustendu : « ùn pudemu dunque scansà u nostru core ind’è l’illusioni di ssu mondu o chjòdelu ind’è a tristezza ; duvimu corre, carchi di gioia ». Marchjà, corre… lampava suvente sta chjama à a giuventù « marchjate ind’è a gioia è a speranza ». I giòvani sò assitati di bellezze umane in un mondu carcu di suffrenze. Ci tocca à riflette oghje torna à tutte ste parulle. Perch’è un Papa hè un omu pulìticu dinù, un capu di Statu chì sparghje a so diplumazìa aldilà di e fruntiere. I so veschi, cardinali è altri missiunarii di u Vaticanu sò mandati à traversu u mondu da impegnassi à sparghje diàlogu è cumpreensione. Di sicuru, travagliu pò ci hè ! Ma basta pocu in fine di contu. Basta à sente e chjame ch’ellu hà lampatu Papa Francescu. À a fin’di a seconda guerra mundiale, dopu à u fracassu è l’orrore nasì, quale s’imaginava di vede un ghjornu un presidente di a repùblica francese è un cancellieru allimanu apperlamanu da diventà sin’à oghje puntelli di a custruzzione aurupea ?
Un ghjornu forse, in Terra Santa, Israeliani è Palestiniani saranu apperlamanu per custruisce u s’avvene cumunu. È cusì sìa. •
