Trentatrè anni sò passati dapoi stu ghjornu maladettu di a festa d’un pòpulu vultata in un drama tremendu. A Corsica era in bullore, colma d’eccitazione è d’allegrìa stu 5 di maghju di u 1992. I cerbelli ùn riflettìanu più. Nunda ùn duvìa parà a vittoria chì tutt’ugnunu bramava. Tutta a cità di Bastia era vestitu di turchinu. Da i ciucci à e personi anziane, tutti avìanu a so sciarpa è a so bandera.
A catastrofa di Furiani hè prima di tuttu a stòria d’un isterìa cullettiva pacata da u sangue di 19 morti, 2357 feriti, è quantu cori per mai adduluriti ! Hè dinù u scàndalu di u sottusviluppu di l’ìsula, chì malgratu e prudezze spurtive ripettute dapoi anni è anni, ùn avìa u stàdiu ch’ellu meritava ssu pòpulu. Furiani hè torna un di i frutti amari di u clanìsimu è i so interessi partisgiani, è l’irrispunsabilità di tutte l’autorità di l’èpica ch’anu francatu tutti l’interdetti è l’illegalità da pudè ghjucà ssu macciu. Furiani hè a cupidità di certi ch’anu vistu in tuttu stu cumbugliu u mezu di fà soldi disunestamente. Hè l’imbecillità di l’omi chì più sentìanu u spachjasonu mughjà « ùn pichjate micca nant’à e parte in farru », è più pichjàvanu di pedi… Furiani hè dinù a vigliaccherìa dopu à a catastrofa chì hà fattu ch’ellu ci hè vulsutu un certu tempu per sustene e famiglie di e vìttime è u cullettivu chì dumandava ghjustizia… Furiani hè l’incumpreensione. Ancu oghje sò mondu a ghjente à ùn capisce u bisognu di « sacralisazione ». Eppò Furiani hè a sulidarità umana a più bella, a sera stessa, i ghjorni dopu. À chì pruvava à succorre e vìttime per cacciale da l’intrecciu di ferrame, à chì dava u so sangue, à chì hà luttatu durante anni è anni da fà ricunnosce u drama naziunale. Oghje, hè fatta. E stituzioni di u ghjocu à pallò francese è l’autorità pulìtiche anu permessu sta ricunniscenza, una lege hè stata aduprata. Mai più un 5 di maghju in Francia ùn si ghjucherà un scontru prufessiunale.
È oghje ? Oghje, Furiani hè u sguardu di a giuventù. Quella nata in u 1992 è l’annate dopu. « Da Macinaghju à Bonifaziu, tuttu u mondu hè statu toccu, hè nurmale ch’oghje i nostri giòvani pòssinu sapè ciò chì s’hè passatu u 5 di maghju di u 1992 » hà spiecatu Stèfanu Vannucci, presidente di a Lega corsa di futbol. « A giuventù hè a nostra prima cìbule perchè ghjè ella chì dopu hà da cuntà sta stòria. Perchè quale fussi a stòria, ùn deve micca esse scurdata. Ghjè una chjama à vigilanza » dice Josepha Giudicelli ch’ùn hà micca avutu a scenza di cunnosce u so babbu, o cusì pocu, chjuca chjuca ch’ella era cù a so surella Lauda, quand’ellu hè statu arrubatu à e so vite cù e 18 altre vìttime. Furiani hè un duvere di memoria ch’omu deve à tutte ste suffrenze. Testimugnà è tene vivu u ricordu da pudè unurà e vìttime, ma dinù da tirà e lezziò di i nostri sbaglii è rispunsabilità cullettive, da ch’elle ùn si riprudùcinu più. Hè infine una manera di dà un sensu à tuttu què. Hè per quessa chì tutti l’anni noi, è i nostri zitelli dopu à noi, si dèvenu di parlanne. •
NDLR : Stu 5 di maghju, appuntamentu à a stela à 4 ore dopu meziornu in Furiani. A tradiziunale messa in umagiu à e vìttime sera data à 6 ore à a Catetrala Santa Maria di Bastia.
