L’associu Mare Vivu hè statu creatu in Pinu in 2016 da l’iniziativa d’un paghju di studiente. U scopu : « Custituisce un polu d’eccellenza in scienza participativa è ambientale in Corsica, mubilizendu a giuventù impegnata pè a salvezza è a valurisazione di a biodiversità marina ».
L’associu s’hè spezializatu ind’è a lotta contr’à a pulluzione di plàsticu in Mediterràniu, a preservazione di a biodiversità marina, a sensibilisazione à l’inghjochi energetichi è climàtichi. Sviluppa arnesi nuvatori pruvendu à mubilizà un màssimu d’attori lucali. Mare Vivu prumove u zeru lozzu è brama d’avè un rolu mutore nant’à u svegliu di e cuscenze : « ogni citatinu pò impegnassi è agisce contr’à e pressioni chì strùghjenu l’ecosistemi marini ».
L’associu hà ricevutu u premiu Biodiversità 2018 di u ministeru di a Transizione eculògica è sulidaria, pè u so prugramma ecovuluntariu CorSeaCare. Era in cumpetizione cù 1200 prugetti in Francia è Oltramare.
Ogni estatina dapoi u 2016, una decina di personi pàrtenu à navigà cù un imbarcazione zeru emissione. À longu à a missione chì dura un mese, CorSeaCare cunduce azzioni ecocitatine da sensibilizà u pùblicu à i perìculi ambientali. À tempu, prova l’arnesi imaginati à longu à l’annu per pulisce e sponde, pulisce u mare, ricensà i mammiferi marini, arricoglie dati scientìfichi nant’à a salute di l’ecusistemi, lotta contr’à u plàsticu, i biomedia, ecc. « Mediterràniu hè un puntellu di a biodiversità marina. Solu 1 % di l’oceani accoglie più di 15 % di a biodiversità marina cunnisciuta : 18 % di a flora marina mundiale, è 7,5 % di a fàuna, cù più di 30 % di spèzie endèmiche ». Puru, a maiò parte hè « minacciata di sparizione » cù a strughjitura di l’abitati, a pulluzione di plàsticu, u troppu pesca, u riscaldimentu di l’acque, u sviluppu di spèzie invasive. Secondu un stùdiu di l’Unione internaziunale di cunservazione di a natura (UICN), dice torna Mare Vivu « 56 % di e pupulazione di cetacei sò minacciati, 42 % di i pesci, 36 % di i granci è i gàmbari »…
Mare Vivu hè statu ritenutu pè a chjama à prugettu internaziunale Beyond Plastic Med di a Fundazione Albert II, Surfrider Foundation Auropa, Fondation Mava, Tara Expeditions è IUCN. Hè stata scelta pè a seconda volta in 2019 per raprisentà a delegazione francese à l’Assise aurupee di i giòvani in Mediterràniu.
Partecipeghja dinù à d’altri prugetti cum’è Monaco Ocean Week, a Festa di a Scienza, Mare in Festa, a Festa di a Natura, u Festivale Vita Marina, u Festivale d’auturnu di a ruralità, ecc.
L’associu intervene ind’è e scole è i centri d’asgiu, nant’à temàtiche ambientale, cù animazioni cum’è l’Olimpiade per un dettu, nant’à a prutezzione di u mezu marinu. Hà cusì parechji attelli participativi cù a vuluntà d’impegnà i giòvani pè a prutezzione di u liturale è di u mezu marinu, da cundùceli « à riacquistà u so patrimoniu naturale marinu è piglià cuscenza di e prublemàtiche attuale è à vene ».
« Vulemu creà una generazione di giòvani esperti in prugetti ambientali è aiutà à rilancià a valurisazione eculògica di a nostr’ìsula » dice torna l’associu.
Avete capitu, sustene à Mare Vivu ghjè dà un bellu di fiatu à u nostru mare. •
Infurmazione è cunttati : www.mare-vivu.org
