Acrisa di i migranti s’impeghjurisce. Hà da esse di più in più forte, per via di a situazione in Àfrica ch’ùn pò migliurassi sti pròssimi anni, ma dinù per via di e caggioni ch’ùn anu micca da mancà da tutte e parte di u mondu : guerre, dittatture, miseria, ma dinù riscaldimentu climàticu ch’hà da «fabricà» centinaie di millioni di rifugiati climàtichi per l’anni à vene!
A Cuurdinazione interassuciativa di Lotta contr’à l’Esclusione (a CLE), hà salutatu a presa di rispunsabilità curagiosa di u presidente di l’Assemblea di Corsica, Ghjuvan’Guidu Talamoni, è di u presidente di u Cunsigliu Esecutivu, Gilliu Simeoni, ch’anu prupostu tremindui d’accoglie in un portu di Corsica, u battellu l’Aquarius di SOS Mediterranée. Ricusatu in Malta è in Italia, firmava persu in Meditterràniu cù zitelli, donne è omi malati è ciambuttati da u gattivu mare. Parigi hà fattu sapè tandu ch’ùn era di a cumpetenza di a Corsica d’occupassi di sti prublemi… L’Aquarius, cù ssi 629 personi à bordu, hè statu ubligatu di stà in mare trè ghjorni di più per tuccà a Spagna à pudè ci scaricà sta corcia ghjente. D’altri battelli si tròvanu in perdizione in u Meditterràniu, cum’è u Lifeline cù 234 personi à bordu, è Malta o l’Italia cuntinuèghjanu à ricusà l’apertura di i so porti.
U presidente di l’Assemblea di Corsica hà cunfirmatu a so pusizione di porghje sustegnu à sta ghjentarella. Ramentendu u Pàpa Francescu chì chjama à una « ripartizione à paru», hà dettu Ghjuvan’Guidu Talamoni: «a sola pusizione lògica, umana è raziunale… hè quella di u Pàpa Francescu chè no spartimu sana sana : una ripartizione à paru di tutti i paesi aurupei… a Corsica hè pronta à piglià a so parte». St’andatura hè stata vutata u 2 d’ottobre di u 2015, à l’unanimità di l’eletti. À l’èpica digià, u Statu francese ùn hà tenutu contu di stu votu, sclusendu a Corsica di u dispusitivu glubale, per vìa di l’assenza di strutture d’accolta in Corsica. «Mancu di nutritura, gattive cundizioni meteò, portu spagnolu troppu alluntanatu : di pettu à l’urgenza, u Cunsigliu Esecutivu di Corsica prupone à SOS Mediterranée d’accoglie l’Aquarius in un portu di Corsica » hà dettu anch’ellu u presidente di l’Esecutivu, Gilliu Simeoni.
A maghjurità Macron-Philippe, s’hè fracicata nant’à sta quistione di i migranti. U deputatu brittonu, Paul Molac, hè statu cum’è parechji deputati francesi, sulidariu di l’eletti corsi. «In Brittagna, si cunnosce u nostru drittu: ùn s’abbandonna micca ghjente persi soli in mare. Puntu è basta». D’altri anu a paura di truvassi cum’è l’Italia ch’hè stata ublicata d’accoglie 700.000 personi dapoi u 2013… In Amèrica, si chjode a ghjente, in Auropa, omu i si lascia more in mare… 50.000 personi si sò annudati in Meditterràniu sti pochi d’anni.
Eppuru !… Qualsìasi a vuluntà d’accoglie o nò sta ghjentarella, ormai nimu ùn hà più scelta. Sò centinaie di millioni di personi ch’anu da parte di i so lochi induve ùn si pò più campà. Oghje, s’agisce d’addattassi à ssa nova rialità. O fà di Meditterràniu un mare di dolu, o truvà mezu di sparghje a ghjente in tutti i paesi induv’elli puderanu fassi una nova vita, o puru ricustruìscesi aspettendu u so ritornu in u so paese.
Fabiana Giovannini.
