Èranu millaie in Corsica à sfilà contr’à a màffia è pè a vita ssu 15 di nuvembre. Assai giuventù, assai zitellina, personi anziane, ghjente da tutte e mamme, parechji pulìtichi, è i prefetti chì si sò affaccati dinù in fin’di manifestazione in Bastia cum’è in Aiacciu per mustrà u sustegnu di u Statu.
A dimarchja citatina di a cuurdinazione antimàffia hè una rièscita, « Fà trè manifestazioni antimàffia in Corsica in 2025 hè eccezziunale è assai impurtante, cosa ch’ùn era pussìbule qualchi annu fà », hà dettu Ghjuvan’Santu Piazenzotti di u cullettivu Màssimu Susini. A cuscenza avanza. A mubilisazione s’aradicheghja. A vuluntà piglia forza. L’unione si face contr’à sta strage chì imbrutta a nostra sucietà è minaccia a demucrazìa. À a metà di u parcorsu in Bastia, una zitelletta, Francesca Marìa, hà presu a parulla è un minutu di silenziu hè statu osservatu da i partecipanti, nanzu di ripiglia à marchja, sìmbulu à tempu di u rispettu è di a vuluntà di francà i tràmpali di a barbarìa maffiosa. Dalli pettu. Dilli innò. Rompe u silenziu. Parechji arburàvanu un stracciu biancu, appiccicatu dinù à qualchi purtone, forma di rispettu per tutti ssi visi strappati à l’affezzione di i soi, è di l’inghjustizia di tante vite arrubbate, cum’è sìmbulu d’unità contru à u crìmine.
In Bastia cum’è in Aiacciu, ci èranu ghjente di manca, di dritta, eculugisti o naziunalisti, eletti frà i quali u merre di Bastia. In Aiacciu, anu sfilatu dinù u presidente di l’Esecutivu, a presidente di l’Assemblea di Corsica, a presidente di u CESEC, membri di l’Esecutivu, di l’Assemblea è di Corsica è di l’uppusizione municipale inseme pè a prima volta in carrughju. A manifestazione hà pigliatu u visu di Petru Alessandri, agricultore, secretariu generale di l’associu Via Campagnola, assassinatu qualchi ghjornu dopu à a manifestazione di marzu scorsu, à a quale avìa partecipatu, vìttima nucente pè avè dinunziatu e pràtiche maffiose. Custì torna, ci vole à rompe u silenziu. Cuntinuà à dinunzià è à chede ghjustizia. « Ùn accettemu micca chì dapoi 8 mesi, nunda ùn hè statu fattu dopu à l’assassìniu di Petru Alessandri. Dumandemu ghjustizia » hà dettu u presidente di Via Campagnola, Ghjuvan’Dumènicu Musso in presenza di u prefettu di regione Eric Jalon, ch’hà dettu scrìvesi in a cuntinuità di u prefettu Jérôme Filippini rimpiazzatu d’aostu scorsu.
Ci sò state parechje prese di parulle in fin’di manifestazioni, in Bastia cum’è in Aiacciu, da dì torna tutta a determinazione è a vuluntà di a cuurdinazione, i cullettivi è l’associ chì a cumpònenu. Arritti rivenerà nant’à ssi messagi.
Cuntinuemu. Femu fronte. Surtimu di u silenziu. Sparghjìmu i messagi. Dimmu innò à a màffia.
È fora i maffiosi ! •
* Trè cuntendu dinù a manifestazione di marzu scorsu in Aiacciu.
A cuurdinazione adunisce u cullittivu Massimu Susini, A Maffia nò a Vita iè, Plateforme citoyenne, Anticorps, Via Campagnola, U Levante, Zeru Frazu, Le Garde, Si pò fà, a Sentinella, Per a Pace, Inseme a manca, Terres de liens Corsica, Fondation Umani, I Muvrini…
Francesca Marìa pè u minutu di silenziu
«A lotta contr’à a maffia hè longa è diffìciule assai. Ci sò i vivi.
Si vivi si divìdenu trà quelli chì a fàcenu è quelli chì làscianu fà à l’altri. Intantu u velenu maffiosu si sparghje in a nostra sucietà è a si prova à entre in ogni famiglia.
È pò ci sò i morti. I morti chì di règula ci unìscenu u tempu di i funerali.
È pò ci sò i morti nucenti, chì cummòvenu tantu quandu a strage accade è chì dopu, ci ne scurdemu, lasciati par d’altre strage.
A cuurdinazione antimàffia, in sta ghjurnata di cuscenza viva è pupulare, vole assucià, in fratillanza, tutte e vìttime nucente, è e so famiglie, chì sò state culpite da a màffia. Cusì vi dumandemu un minutu di silenziu da accoglie u ricordu di tutte st’ànime cacciate à a vita da assassìnii spietati è crudi.
Cun rispettu è emuzione li mandemu, à tutte, l’abbracciu di core di voi tutti par dilli chè no i ci tinimu vicinu ». •
