A nostra stòria hè ricca è à tempu tremenda. Hè a stòria d’un ìsula mondu volta cunquistata, in core di Meditterràniu, spàziu pulìticu stratègicu, cù e grande strade marìttime di u cumerciu. S’hè sempre rivultata è l’hà pacatu da u sacrifiziu di troppu di i so figlioli… Terra bramata, terra di suffrenza è dolu. Terra d’un pòpulu curagiosu ch’ùn vulìa sottumèttesi. Oghje mondu eroi sò scurdati… ancu assai certi associ pròvanu à fà cunnosce a so stòria, cum’è l’associu di u Ricordu di Ponte Novu, o a Mimoria di u Fium’Orbu.
Creatu in u 1993 da Remondu Ottomani è Petru Santoni, Mimoria di u Fium’orbu hà festighjatu i so 30 anni in 2023. U so scopu hè di fà cunnosce a stòria di u Fium’Orbu, è di difende a lingua è a cultura corsa pruvendu à rimette in memoria i fatti stòrichi ch’anu marcatu i paesi di u rughjonu.
In u 1808, a Corsica era insanguinata da e mullizzose culonne di u generale Morand chì feranu nasce e spressioni pupulare Ghjustizia Morandina o Ch’ellu ti ghjunghji à Morand !… U generale ùn risparmia à nimu. U mìnimu incidente d’un pòpulu chì soffre a miseria è ùn s’hè scurdatu di Ponte Novu, hè l’uccasione di sparghje u so terrore.
U 6 di ghjugnu, vole punisce e fucilate contr’à una gendarmerìa in Prunelli di u Fium’Orbu u 21 di maghju, da paisani sprezzati chì vulìanu fà sente a so zerga. Sbarca Morand cù 400 suldati è arresta 167 omi da 15 à 80 anni in l’Isulacciu, solu per vindicassi postu chì i rispunsèvuli di l’attaccu di a gendarmerìa anu pigliatu a machja. Nove sò ghjudicati di manera spedittiva in Bastia, è fucilati u 4 d’aostu. L’altri sò mandati in e prigiò di Tulò è d’Embrun, ghjittati ind’è fosse puzzicose induv’ella corre a rimigna, topi, scaravagli, è malatìe da tutte e mamme. Sò seppelliti vivi… A maiò parte ci sò morti in pochi mesi. Mancu unu ùn hà pussutu rivede u so paese. U Cuntinente hè statu a so tomba…
L’associu Mimoria di u Fium’Orbu, presidatu oghje da Ghjuvan’Francescu Vinciguerra, prova à fà cunnosce sta stòria, urganizendu tutti l’anni una cummemurazione per ramentà ssu martoriu. A ghjente hè chjamata à addunìscesi per rèndeli umagiu cù una messa è fiori sposti in pede di a stela inaugurata da l’associu in u 2023, accant’à a quella inaugurata in u 1979. Anu cusì pussutu scrive tutti i nomi di ssi disgraziati da chì nimu ùn si ne scordi. L’associu dà dinù cunferenze stòriche è mette in ballu manifestazioni culturale à longu à l’annata.
Ramentassi a stòria hè una manera di riacquistà un passatu, una cultura, un identità. Hè impurtante pè a giuventù da ch’ella cunnosci e so ràdiche. Hè impurtante dinù ch’ella ci fussi una ricuniscenza di e stituzioni corse.
In u Fium’Orbu, in Niolu, in Ponte Novu, ssi martòrii sò a nostra memoria cullettiva.
Dice a stela di l’Isulacciu : « In ricordu di 167 omi da 15 à 80 anni, arristati in la ghjesa di l’Isulacciu di Fium’Orbu u 6 ghjunghju 1808 da òrdine di u Generale Morand. Dipurtati in li prigiò francese induve li mòrsinu tutti. »
Ch’elli ripòsinu in pace. •
Infurmazione : Facebook « Associu Mimoria Diu Fiumorbu »
