S’hè spenta Francine Leca à l’età di 86 anni. Hè stata a prima donna in chirurgìa cardiaca in Francia ! Cù ella, hè un munumentu di a medicina corsa chì si ne và.
Hà fattu a so carriera ind’è l’uspidali universitarii parigini induv’ella s’hè spezializata in e malfurmazioni congenitale. Hà fundatu l’associu Mécenat-Chirurgie cardiaque à l’imàgine di a so grande generosità è di una grande cuscenza prufessiunale. L’associu hè una catena di sulidarità pè i zitelli di paesi disgraziati ch’ùn ponu avè drittu à curassi. Cusì sò millaie di zitelli in una sessantina di paesi in u mondu ch’anu pussutu esse operati per campà una vita nurmale di zitelli in bona salute.
Francine Leca firmava sempre à l’ascolta di i bisogni di a Corsica. Era membru di Corsica Diaspora, è pocu fà, s’era assuciata à a chjama di parechji duttori è persunale medicali chì scumbàttenu per apre in Corsica un CHU, centru uspitaliere universitariu. Dicìa : « u core d’un zitellu hè un òpera d’arte ch’ellu ci vole à riparà. »
Arritti manda cunduleanze afflitte à tutti i soi adduluriti. Ch’ella riposi in pace. •