Orphelin’Aide hè un associu natu pocu fà, in 2020, à a sèguita di l’adduzzione di dui zitelli à u Congo Brazzaville da i so parenti corsi Maud è Battista Palmieri. Oltre u parcorsu di cumbattenti ch’elli anu fattu per diventà parenti cù dui maschjucci da ch’elli àppiinu una vita più bella, Maud è Anton’Battista sò stati prufundamente tocchi da a misèria ch’elli anu scupertu culandi. « Ùn vulìamu micca vultà senza scurdassi di a puvertà chì ci hà circundaci à longu à u nostru sughjornu à u Congo » dìcenu sti dui parenti carchi d’amore è di generosità. « L’associu hè statu creatu nanzu à a nostra partenza, ma hà pigliatu prupurzioni maiò quandu simu vultati. Avemu prufittatu di stu viaghju per avè cuntatti cù attori lucali. Travagliemu solu cù ghjente cù quale avemu una cunfidenza ferma » rassicurèghjanu Maud è Anton’Battista.
Quì in Corsica, urganizèghjanu campagne per aiutà st’attori lucali culandi, « i soldi ricuperati ghjòvenu solu à urfanelli è zitelli senza nunda ». Cusì, tutti l’anni festighjèghjanu Natale cù l’urfanelli di Pointe-Noire, capitale ecunòmica di u Congo (a capitale pulìtica essendu Brazzaville). Sò centinaie di zitelli dapoi trè anni à avè ricevuti rigali è cicculati per Natale ! Tutti l’anni, Orphelin’Aide permette dinù à sti zitelli di fà a so rientrata in scola, cù cartine, quaterni, mine, ma dinù scarpi è vestiti.
Orphelin’Aide partecipeghja à a furmazione di zitellette in u so centru di cusgitura, hà permessu a custruzzione d’una corte cuparta è di un riffettoriu à u centru di u Padre Anton in Pointe-Noire. L’azzioni sò finanzate in grazia à chjame in lìnea, o serate è presenza in e fiere in Corsica. « Simu leati pè u sempre à u Congo Brazzaville in gràzia à i nostri figlioli » spiècanu Maud è Anton’Battista.
L’associu agisce per avà à Pointe-Noire, ma hà vucazione à impegnassi dapertuttu in u paese. « Simu pronti à aiutà l’urfanelli chì ne anu u bisognu, basta à avè un cuntattu abbastanza fidu è sicuru » dìcenu torna Maud è Anton’Battista.
Aspèttanu u vostru aiutu preziosu, ancu puru s’elli sò pìcculi doni, si sà chì u pocu face l’assai è cù sti pochi soldi, si face mondu mare è maraviglia per sti ciucci in stu paese frà i più pòveri di a pianetta cù 60 millioni d’abitanti chì càmpanu cù menu di 2,15 dòllari à u ghjornu (statìstica mundiale 2022). Un paese marturiatu da a guerra, u terrurìsimu è a curruzzione. Una persona nant’à sei in situazione di puvertà strema in Àfrica campa à u Congo Brazzaville.
Orphelin’Aide lampa una chjama à tutti, capi d’impresa, ghjurnalista, citatini… da ch’elli pòrghjenu sustegnu à e so azzioni. « Una stonda di felicità vale 1000 anni di stòria » dice, citendu Voltaire, stu bravu coppiu chì fà parlà in bè di a Corsica culandi per zitellucci ch’anu tantu bisognu. •
Cuntattu : orphelinaide.org
