Ùn ci hè statu trègua a notte di Capu d’Annu in Ucràinia. Bumbardamenti rùssii anu fattu torna morti è dinù, in zona occupata, bumbardamenti ucrainiani anu tumbatu è feritu a ghjente. In Belgorod, in Russìa, sò morti quasi una trentina di personi è più d’un centu sò stati feriti. A guerra si face à colpi di droni, in mare, in terra, in cielu, è, nant’à u fronte, i chjami è rispondi insanguinati di e bombe ùn piàntanu mancu à pena. Parte è manca, i suldati sòffrenu u fredu, a paura, a fatiga, è càscanu à centinaie…
Ùn ci hè statu trègua nemancu in Gazà. Mòrenu sempre sott’à e bombe omi, donne è zitelli parte palestiniana.
È e rochette di u Hamas cuntinuèghjanu à esse strutte da i missili anti aeriani israeliani. Fèrmanu sempre decine d’ostagi ghjudei è quelli cappiati còntanu u so martoriu.
U guvernu israelianu prumette una guerra ch’hà da durà sin’à ciò chì Gazà ùn sìa più una minaccia. U guvernu palestinianu parla di più di 21.600 morti dapoi u principiu di a guerra u 7 d’ottobre scorsu…
In mare rossu, puntu centrale di u cumerciu internaziunale, l’Americani mèttenu u so nasu, da prutege i passi è veni di battelli di trasporti cumerciali. Cusì trè battelli Houthis sò stati strutti da i port’aviò americani. L’Houthis sò pirati di i mari. Ma sò dinù sustegni di l’Iranu… È u primu di ghjennaghju un battellu militare iranianu si n’andava sopra piazza da minaccià a marina americana. Per chì fà… ?
U primu di ghjennaghju torna, in Corea di u Nordu sta volta, u guvernu dittaturiale, in manu à un scemu strapazzu, hà minacciatu cù e so arme nuclearie u mondu sanu, prumettendu di tuccà Seoul, capitale di a Corea di u Sud chì campa à l’occidentale. Hà dinù dumandatu à a so armata d’appruntassi à una guerra contr’à a Corea di u Sud. U perìculu hè dinù chì u Nordu hè sustenutu da a Russìa, è u Sud da i Stati Uniti…
Parte chinese, a guerra minaccia dinù in Taiwan chì hà u so pròpiu guvernu, sustenutu da i Stati Uniti… A China vole ricuperassi Taiwan. « A quistione taiwanese hè l’affare di i Chinesi è deve esse risulutata da elli soli » hà dettu Xi Jinping. « Mai ci impedisceremu d’utilizà a forza »… hà dettu torna u presidente chinese…
È cusì, allora chì milliarde di personi si basgiàvanu stu primu di ghjennaghju per augurassi una bon’annata, parechji lochi di a pianetta a minàccianu d’un cunflittu mundiale… L’omi ùn finisceranu mai di liticassi per un pezzu di terra in più, per soldi, pè u cumerciu, per l’orgogliu è e so fame di putenza ? Cumu tuccà sta brama essenziale di pace è di salute ? Cumu fà chì sse duie parulle sèmplice, chì tradùcenu l’umanità chì tutt’ognunu pò purtà in sè, pòssinu spàrghjesi in tutti i lochi di cunflitti, è diventà realità ? Tutti l’anni a sparghjimu in giru à noi, augurendu pace è salute à i nostri, à a Corsica, à u mondu. Chì 2024 possi vince a guerra. È cusì sìa. •
