Sò forse e brame ch’anu mancatu u più in a stòria di a Corsica. È oghje dinù… Tuttu u mondu spera a salute, per sè è pè i soi, senza salute omu ùn campa bè. Bisognu ci hè nant’à u puntu di vista individuale, ma dinù nant’à u pianu cullettivu. Pè u pòpulu corsu, pè a Corsica, pè a sucetà, bramemu una bona salute. A salute vole ancu dì quì divizia, è forza è mezi da scumbatte nant’à u puntu ecunòmicu è suciale. A salute, ci n’hè bisognu pè a Corsica chì perde a so làscita di a terra di u cumunu è a civilisazione agrusilvupasturale ch’hà fattu a nostra cultura, è chì oghje si spenghje pocu à pocu.
I sapèfà si sguàssanu cù u tempu è l’abandonu di i paesi. Ùn si tramàndanu più, affucati da usi furesteri… ancu sè per furtuna sò sempre numarosi ghjente à mantene l’usi è e tradizioni, in i paesi, in i gruppi culturali, in e cunfraterne, eppò in l’imprese agrìcule o artisgianale chì tramàndanu richezze nustrale.
A pace dinù hà mancatu da generazioni landane, è manca sempre. E ràbbie di e vindete anu fattu vìttime da una generazione à l’altra è a cultura corsa hè marcata ancu oghje da ssi tempi d’odii è di stirpere. Si vede in u cultu di l’arme, in i riflessi clanisti, in e ghjelusìe… U spìritu di pace induv’ellu era u 23 di dicembre scorsu in Aiacciu ?
U drama ch’hà cacciatu a vita à un omu è feritu i so cumpagni chì si scialàvanu in caffè ci dice disgraziosamente quant’ella hè dura à impone ssa pace. S’hè sparsa suffrenza una settimana dopu à a cumunione è sìntimi cullettivi cusì belli campati cù a venuta di Papa Francescu.
A pace hà mancatu in Aiacciu, cum’ella hà mancatu in a stòria. Mondu volta assaltata, cunquistata, sprezzata, a Corsica è u so pòpulu, n’anu campati tempi di guerra è d’invasioni ! Da i feniciani, i fucei, l’etruschi, i liguresi, i siracusani, i grechi, i cartaginesi, i rumani, i barbareschi, vandali è ostrogotti in u mediuèvu, i mori, i pisani, i genuvesi, l’inglesi torna, i francesi infine…. senza smenticassi di l’alemani è i taliani durante a seconda guerra mundiale… Ogni volta, s’hè sparsa cù sti passi è veni, culunisazione, schiavitù, esiliu, razzià, ruine, atrocità… dopu à u fragellu barbarescu, e famiglie èranu custrete à pacà per ritruvà i soi imprigiunati. Èranu tempi duri è mischini, ancu sè certe invasioni anu datu sèguita à tempi d’appacere è di mischiu. Hè cusì chì a pace hè piazzata in prima in l’òrdine di e priurità in Corsica.
Oghjeghjornu, e cose anu pocu cambiatu. Trà i raporti sempre diffìciule è buciardi cù u Statu francese, è a crèscita di i cumpurtamenti maffiosi, i tràffichi, e viulenze è l’inghjulie, bisognu ci hè sempre di chjamà a pace. È di chjamala nanzu à a salute.
Pace è Salute sò parolle d’amore ch’omu sparte cù i soi è cù l’altri vulinteru. Una chjama à custruìle, à mantènele, à nutrìscele, à spàrghjele… Vale à dì dinù quant’elle sò suspese à a nostra vuluntà è à e nostre capacità di fà è di decide. Capu d’Annu dopu à Capu d’Annu serà ch’ùn ghjunghjimu à mètteci abbastanza cunvinzioni ? •
