Natu in u 1992, Per a Pace hè un associu chì agisce in Corsica è in u mondu da prumove a pace, u rispettu di i diritti umani, a sulidarità, u sviluppu durèvule, u duvere di memoria, u scontru, i scambii, a cultura… « Hè cusì chì luttemu contr’à e sclusioni, l’odiu, u razzìsimu, a zenufubìa chì si stàllanu di manera inchietante in tutte e sucietà » spieca u so purtavoce Jacques Casamarta.
« Nisun cuntinente ùn hè sparmiatu da i cunflitti, e guerre, a corsa à l’armamenti, u riscaldimentu climàticu, e cunsequenze strughjitrice per l’Umanità è u s’ambiente. Di pettu à tutti sti perìculi, u scopu di u nostru associu hè di vince e cuscenze pè a pace, indirizzènduci à i citatini, e stituzioni internaziunale, i dirigenti di e nazioni, tutti quelli ch’anu un putere, ancu chjucu, da ch’elli mèttinu tuttu in ballu induv’elli nàscenu i cunflitti, per ricircà suluzioni neguziate. Dapoi anni, scumbattimu fermi pè a pace è a demucrazìa. »
Per a Pace urganizeghja missioni cù l’aiutu di parechji dunatori è partenarii ecunòmichi. Di nuvembre scorsu, cù l’associu pupulare di i Tunisiani di Corsica anu traspurtatu 90 metri cubi di materiale medicale in Tunisìa pè a rianimazione, blocchi uperatorii, letti medicalizati, futtogli, mòbuli è materiali da tutte e mamme, ricuperati pè u più ind’è l’anzianu uspidale d’Aiacciu ch’hè statu chjosu. Tuttu stu materiale hè statu offertu à l’uspidale di Jendouba, a so antenna di Ghardiamaou à u nordu ueste di a Tunisìa, è à l’Unione di Sulidarità Suciale di u paese. Era a sesta volta chì l’associu andava à porghje u so sustegnu culandi. Per a Pace era dinù à u Maroccu dopu à u terramotu di l’8 di sittembre ch’hà fattu millaie di morti è feriti, ùn si sà quantu spariti è 300.000 senza tettu à u sud ueste di u paese.
Per a Pace sustene l’Ucrainiani cù parechji altri associ cum’è Solidarité Corse Ukraine è u Succorsu Pupulare francese, partecipendu à parechje missioni per porghje materiale medicale, medicamenti, rigali pè i zitelli… D’aprile 2022, 30 metri cubi di prudutti sò stati traspurtati à longu à 1500 chilòmetri à traversu l’Italia, a Sluvenìa, l’Ongrìa… sin’à Krynica in Pologna induve u materiale hè statu rimessu à associ ucrainiani.
Custruzzione di tafunera per l’acqua à u Burkina Faso, azzioni pè u climà, sustegnu à e vìttime di l’inundazioni in Sardegna è in Sicilia, viaghji di memoria in Ravensbrück è in Auschwitz, scàmbii culturali di cantu cù a Macedonia, o di teatru cù a Serbìa, aiutu sanitariu in Grècia, mostre stòriche nant’à i Balkans à u museu Fesch, sustegnu suciale da tutte e mamme… sò numarose è vàrie l’azzioni di Per a Pace.
U so mottu hè l’Umanu anzituttu. Cum’è parechji associ in Corsica, nè l’Umanitariu, o a difesa di l’ambiente, partecipeghja cusì à sparghje una bella imàgine di a Corsica in u mondu. •
Cuntatti : https://perapace.eu
