Hè pè u so 84u anniversariu, d’aostu 2018, ch’Edimondu Simeoni scrivìa ss’artìculu in corsu è in francese. Hè publicatu in u so libru « L’inéluctable liberté ». S’ellu era sempre di ssu mondu, serìa statu frà i primi à dinunzià l’attache di ssu guvernu è frà i primi à manifestà pè a nostra lingua u 29 di maghju in Bastia, à nome di a libertà. Sprichju.
« Dopu à sessant’anni d’impegnamentu arrabiatu, di lotta à u serviziu di u pòpulu corsu, purtatu di ghjente di sfarente organisazione pulìtiche o da sèmplici citatini, sapemu, à misura chì noi ci’avvicinemu à a fine di a nostra vita, è ghjè ùtile di ramintà la à l’accorta, ciò chì era è hè firmatu u sensu di u cumbattu à l’iniziu, i strazi, a presa di cuscenza chì hà sbuccatu nant’à a situazione attuale ; mà cì vole dinò pensà l’avvene.
Ùn simu micca nati di nunda ; èramu a sumente assai anziana d’un pìcculu pòpulu – induve a persunalità di Napulione è à un altru livellu, di Pasquale Paoli, hanu stunatu u mondu sanu – pòpulu chì hè arradicatu ind’è a so tarra, à i so lochi, à a so cultura ; issu pòpulu si hè sempre vultatu contr’à a vulintà di i culunizatori d’impone li e so legge, di piglià ci a nostra tarra ma, più si vene à arrubà a nostra libertà è sradicà a nostra identità : i Barbareschi, i Rumani, i Genovesi, i Francesi, i fascisti hanu vistu chì noi èramu un pòpulu, lìbaru è senza pastoghje. È u vulìamu firmà.
Di sicuru chì i strazi, e suffrenze sò stati nostri è chì tutte e lotte hanu avutu eroi è traditori, hanu imbulighjatu u curagiu è e demissioni, è capacità è i fiaschi ; sensa scurdà si di e viulenze di e vindette, di a lotta d’emancipazione chì hanu casticatu u nostru pòpulu, suminate ch’elle sò state, per issu ùltimu duminiu, di derive rare ma culpèvule è dunque criticate.
(…) Ma a vera rivuluzione chì noi femu oghje è chì noi campemu avà, avarà bisognu di tempu, di una o duie generazioni, per suminà a demucrazìa è custruì una Corsica nova. U tempu, più cortu, hè necessariu dinò per piglià u versu d’una gestione rispunsèvule, sceglie altre orientazioni ecunòmiche è suciale, eculugiste è culturale ; ci volerà u tempu per almanacà una altra andatura ; è sempre u tempu ci volerà torna per risolve tutti i prublema di sviluppu, di l’impieghi, di furmazione di l’omi, di salute, d’alloghju, di precarità…
Ma a situazione di u pòpulu corsu ferma periculosa, à càusa di l’evuluzione di u mondu attuale, à càusa dinò di e forze cunservatrice è di a speculazione ; ma u perìculu vene sopratuttu di u Statu francese è di u so guvernu attuale ; a cunvergenza – per ùn dì a cumplicità – ùn hanu micca cambiatu a so pulìtica culuniale in Corsica, sempre listessa dapoi dui sèculi. Macron hè freddu, partigianu di a forza è micca di u cuntrastu demucràticu, chjosu à tutta vera suluzione pulìtica è dice cume Giscard : « ci sò i prublemi in Corsica ma micca un prublema corsu » ; ma u so guvernu ùn rincula micca davanti a pruvucazione, cume quella di trascinassi in Corsica à Chevènement, pè e ceremònie in memoria di u Prefettu Erignac.
A Corsica hà a sete di libertà – dapoi sempre di demucrazìa –, di dignità è di sviluppu – dapoi sessant’anni ; a Corsica dispone di carte maestre per priparà l’avvene (diaspora di prima trinca, risparmiu di deceni di milliardi d’àuri, richezze naturale impurtante, giuventà vulintaria…)
Cumu fà ricunosce u nostru pòpulu ? Cumu acquistà a libertà ? Prutege a tarra ? Cumu agisce è luttà ? Cumu custruì un Paese di drittu è di sviluppu, più ghjustu è più ugualitariu è chì deve ripusà nant’à e règule di l’umanìsimu ?
Sopratuttu ci vole à scantà l’idea d’aduprà a forza, l’idea di viulenza o di rumpitura incù u Statu francese. Un statutu di vera autunumìa, ind’è l’Auropa è ind’è a Repùblica francese ci pare ragiunèvule. Hè sempre a nostra listessa rivendicazione dapoi u 1973. U mondu sanu l’hà adupratu. Ma cumu agisce ? Cumu fà ? Cumu custruì a demucrazìa è u nostru paese ?
U primu scopu hè di fà cresce a cuscenza quì è ind’è a diaspora ; poi, di manera fidata, di travaglià incù tutte è tutti ind’è una sucietà appaciata, per circà l’unione quand’ella hè pussìbule indè a ricerca di suluzione, per l’elezzioni è incù i cuntratti.
A Corsica, tribbulata, ha persu i so valori di travagliu, di rispettu, d’onestà ; l’interessu generale s’hè scioltu ind’è l’egoìsimi è davanti à u soldu. Hè per quessa chì a priurità deve esse data, di manera ferma è in ogni locu, à a demucrazìa, à l’ètica, à u civìsimu – senza dibulezza –, à l’educazione è à a furmazione ; ind’è u rispettu di a libertà è di u spartimentu, di a fratellanza, di a sulidarità. » •